Məlum olduğu kimi Kəşmir problemi sonuncu dəfə Hindistan parlamentinin 5 avqust 2019-cu il tarixində beynəlxalq hüquqa, hətta Hindistan qanunlara zidd olaraq, Cammu və Kəşmirin yüksək muxtariyyatını ləğv etmək haqqında qərarını qəbul etməsindən sonra yenidən aktuallaşdı. Bu qərarın ardınca Kəşmirdə yaşayan 200-ə yaxın müsəlman siyasətçinin həbs edilməsi, Kəşmirdə telefon və internet xətlərinin kəsilməsi, ərazidə yaşayan insanlara qarşı təzyiqlərin artırılması və regiona əlavə olaraq 180 min nəfərlik Hindistan qoşunun yeridilməsi Kəşmiri “açıq hava həbsxanası”na çevirdi və regiondakı vəziyyəti daha da kəskinləşdirdi.
Kəşmirdə Hindistanın yeni bir işğal siyasət ilə üzləşən Pakistan çətin dövrlərdən keçməsinə baxmayaraq Qarabağ problemində Ermənistanın həyata keçirdiyi radikal siyasəti diqqətdən qaçırmadı və Ermənistan rəhbərliyinin münaqişəni alovlandıracaq addımlarını sərt şəkildə qınadı.
Belə ki, ötən günlərdə Pakistanın Xarici İşlər naziri Şah Mahmud Qureşi İslam Əməkdaşlıq Təşkilatının BMT Baş Məclisi çərçivəsində keçirilmiş qrup görüşündə dünyanın Ermənistana Azərbaycan ərazilərini azad etməsi və işğala son qoyması üçün daha çox təzyiq göstərməsini tələb etdi.
O qeyd etdi ki, Pakistan Azərbaycanı dəstəkləyir və Ermənistan kimi təcavüzkar qüvvələrin dünyadakı əsas güclər tərəfindən sərt şəkildə qınanılmadığı təqdirdə sülhü bərqərar etmək mümkün olmayacaq.
.
Həmçinin Mahmud Qureşi əlavə edib ki, Dağlıq Qarabağ on illiklər boyunca insanların əzab-əziyyət çəkməsinə səbəb olmuş bir yanar atəşdir. Kəşmir və Dağlıq Qarabağ oxşar hallarla üzləşib. Nazir Ermənistan silahlı qüvvələrinin Dağlıq Qarabağı dərhal tərk etməsini tələb edib.
Göründüyü kimi Pakistan ən çətin durumlarda belə Dağlıq Qarabağ problemində Azərbaycanın haqlı mövqeyini dəstəkləyir.
Qeyd edək ki, Pakistan həm də Azərbaycanın müstəqilliyini tanıyan ikinci dövlətdir. Pakistan Ermənistanla demək olar ki, heç bir diplomatik əlaqə qurmur, hətta Ermənistanı müstəqil dövlət kimi tanımır. Eyni zamanda, Pakistan illərdir Dağlıq Qarabağ məsələsində Azərbaycana dəstək olur, bütün beynəlxalq tribunalardan onun haqlı mövqeyini müdafiə edir.
Bəs Azərbaycan Respublikasının Kəşmir məsələsi ilə bağlı mövqeyi nədən ibarətdir?
Eurasia Diary-nin bu sualına cavab verən Xarici İşlər Nazirilyinin mətbuat katibi Leyla Abdullayevə nazir Elmar Məmmədyarovun bu məsələ ilə əlaqədar Nyu Yorkda verdiyi bəyanatı xatırladıb:
"Xarici İşlər naziri Elmar Məmmədyarov 25 sentyabr tarixində Nyu Yorkda BMT Baş Assambleyasının 74-cü sessiyası çərçivəsində keçirilən İslam Əməkdaşlıq Təşkilatının (İƏT) Cammu və Kəşmir üzrə Kontakt Qrupunun iclasında iştirak edib.
Xarici İşlər naziri Elmar Məmmədyarov iclasda çıxış edərək Azərbaycanın beynəlxalq birliyin məsul üzvü qismində, Cammu və Kəşmir məsələsinin beynəlxalq hüququn norma və prinsipləri və BMT-nin müvafiq qətnamələrinə uyğun olaraq, habelə beynəlxalq humanitar hüquqa tam hörmət etməklə sülh yolu ilə həllinin dəstəklədiyini ifadə edib”.
Azərbaycan-Pakistan parlamentlərarası əlaqələr üzrə işçi qrupunun üzvü, millət vəkili Tahir Rzayev Eurasia Diary-ə verdiyi açıqlamada Azərbaycanın Kəşmir məsələsində sərgilədiyi mövqeyi izah edib.
T.Rzayev əvvəlcə Azərbaycan parlamentinin üzvlərinin və bütün xalqın İƏT toplantısında Azərbaycan mövqeyini müdafiə edən Pakistan Xarici İşlər nazirinə minnətdar olduğunu vurğulayıb:
“Pakistan Azərbaycan müstəqilliyini tanıyan sayca ikinci dövlətdir, qardaş respublikadır. Müstəqilliyimizin ilk illərindən biz Pakisanın dəstəyini müşahidə etmişik. O dövrlərdə biz Azərbəycan və Pakistan arasındakı əlaqələrin möhkəm olmasını istəyir və buna çalşırdıq. Çünki Pakistan əhalisinin sayına, hərbi imkanlarına və geosiyasi durumuna görə islam dünyasının öncül dövlətlərindən biri idi. İstər Ulu Öndər Heydər Əliyevin, istər sə də prezident İlham Əliyev dövründə Azərbaycan-Pakistan münasibətləri yüksələn xətlə inkişaf etmiş və iki dövlətin qardaşlığı daha da möhkəmlənmişdir. Xüsusən siyasi və hərbi sahələrdə əməkdaşlıq Azərbaycan və Pakistan arasında son illərdə daha da intensivləşib. Pakistan rəsmiləri istər beynəlxalq ictimaiyyət qarşısında, istərsə də Azərbaycanda daim Dağlıq Qarabağ problemində Azərbaycanın haqq səsini müdafiə ediblər, problemin həllinə dəstək veriblər. Çox yaxşı haldır ki, İƏT-in sonuncu toplantısında da Azərbaycanın haqlı mövqeyi Pakistan tərəfindən müdafiə edildi və dəstəkləndi. Hər birimiz cənab Qüreşinin açıqlamalarınından qürur duyduq. Cənab Qureşinin açıqlamalarına nəzər salanda bu fikirlərin Pakistanın deyil də, sanki Azərbaycanın yüksək vəzifəli bir məmurun Qarabağla bağlı danışdığını düşündüm. Həqiqətən də bu çox qürurvericidir. Ona görə də biz Pakistan rəhbərliyinə Cənab İmran Xan və Cənab Qureyşi başda olmaqla xüsusi minnətdarlığımızı bildiririk".
Deputat həmçinin Azərbaycanın daim Kəşmir məsələsində Pakistanın yanında durduğunu, ona dəstək olduğunu deyib.
“Azərbaycan hökuməti hər zaman bu məsələdə qardaş Pakistan Respublikasını dəstəkləyib. Və bu gün də mən Azərbaycan millət vəkili kimi bu fikirdəyəm ki, Pakistan öz torpaqlarının azadlığında, Kəşmir məsələsində haqlıdır və Azərbaycanla birlikdə bütün beynəlxalq ictimaiyyət Pakistana öz dəstəyini nümayiş etdirməlidir. Kəşmirdə və Qarabağda yaşayan əhali bənzər təcavüzlərlə, qırğın və işğallarla üz-üzə qalıb. Həm kəşir, həm Qarabağın bir hissəsi işğal edilib. Ona görə də Azərbaycan bu işğalı tanımır və Xarici İşlər nazirimizin də qeyd etdiyi kimi beynəlxalq hüququn həm Qarabağda, həm də Kəşmirdə bərqərar olmasını tələb edir, dəstəkləyir. Lakin təəssüflər olsun ki, BMT-nin həm Kəşmir, həm də Qarabağ haqqında qəbul etdiyi qətnamələrə riayət edilmir. Beynəlxalq ictimaiyyət Kəşmir və Qarabağ probleminə səssiz qalmamalıdır. Çünki bu səssizlik yeni münaqişə ocaqlarının formalaşmasına səbəb ola bilər”, - deyə T.Rzauyev bildirib.
Nicat İSMAYILOV