Bu gün Beynəlxalq Avrasiya Mətbuat Fondunun Prezidenti, Azərbaycan Mətbuat Şurasının sədr müavini Umud Mirzəyev Sputnik Beynəlxalq İnformasiya Agentliyinə Estoniya hökumətinin Sputnikin oradakı əməkdaşlarını cinayət məsuliyyətinə cəlb etmə hədələmələri ilə bağlı şərh verib.
Eurasia Diary-nin sputnik.az-a istinadən verdiyi xəbərə görə, Umud Mirzəyev beynəlxalq səviyyədə jurnalistlərin bu cür üzləşdiyi problemləri kəskin şəkildə tənqid edib.
“Öncə qeyd etmək istərdim ki, bu yaxınlarda Əl-Cəzirə televiziyasının təşəbbüsü ilə Dohada keçirilən böyük bir simpoziuma dəvət olundum. Həmin simpoziumda da jurnalistlərin və medianın hüquqları ilə bağlı eyni səpkidə mövzuları müzakirə etdik. Ümumiyyətlə beynəlxalq səviyyədə jurnalist cameəsinin üzləşdiyi bu cür problemlər kəskin şəkildə tənqid olunur. Söz azadlığı insan azadlığının təməl prinsiplərindəndir. Ola bilər ki, hansısa jurnalistin fəaliyyətində şübhəli məqamlar olsun. Ancaq bunu bütün kollektivə aid etmək yolverilməzdir. Məsələlərin ultimativ şəkildə həllinə nail olmağa çalışmaq nə beynəlxalq qanunlara, nə də Estoniyanın öz qanunlarına uyğundur”