“Vurulmaqdan” qorxan məmurlar dövlət çevrilişinə cəhd edə bilərmi? | Eurasia Diary - ednews.net

26 May, Çərşənbə axşamı


“Vurulmaqdan” qorxan məmurlar dövlət çevrilişinə cəhd edə bilərmi?

Analitika A- A A+

Məlumat verildiyi kimi, iki gün əvvəl Dövlət Təhlükəsizliyi Xidməti və Baş Prokurorluq tərəfindən həyata keçirilmiş birgə əməliyyat-istintaq tədbirləri nəticəsində Azərbaycan Respublikası Dövlət Sərhəd Xidmətinin (DSX) Sahil Mühafizəsinin vəzifəli şəxslərinin qanunazidd əməllərinin qarşısı alınıb. Faktla bağlı Baş prokuror yanında Korrupsiyaya Qarşı Mübarizə Baş İdarəsində başlanılmış cinayət işi üzrə DSX-nin rəis müavini general-leytenant Nağıyev Əfqan Vəli oğlu, DSX-nin yüksək rütbəli hərbi qulluqçuları və mülki şəxslər şübhəli şəxs qismində saxlanılıblar. Bundan əvvəl də 5 icra başçısı və Mədəniyyət Nazirinin muavini DTX tərəfindən saxlanılmışdı.

Ötən gün isə Baş Prokuror Kamran Əliyev Azərbaycanda 5 rayon prokurorunu təqaüdə göndərib. Təqaüdə göndərilən prokurorlar arasında sabiq Daxili İşlər Naziri, Təhlükəsizik Şurasının katibi Ramil Usubovun qudası, uzun illərdir Xətai rayon prokuroru vəzifəsini daşıyan Yusif İldırımzadə də olub. (O, eyni zamanda bir müddət əvvəl bağlanan "AmrahBank"ın rəhbəri Yunis İldırımzadənin qardaşıdır. Yusif İldırımzadə 2007-ci ildən Xətainin prokuroru idi) Ali Məhkəmənin sədri Ramiz Rzayevin xalası oğlu Salman Məmmədli və Mərkəzi Seçki Komissiyasının (MSK) sədri Məzahir Pənahovun qardaşı Elxan Pənahov da vəzifəsindən azad edilən prokurorların siyahısındadır.

Görünür, iqtidar bu həbs və işdən çıxarmalarla sadəcə korrupsiyanın deyil, nepotizmin də qarşısını almağa çalışır. Bəs iqtidarın bu əməliyyatlarını islahatlar kampaniyası adlandırmaq olarmı? Hökumətin bu istiqamətdəki fəaliyyətinə hansı əngəllər yaradıla bilər?

Bu və digər sualları politoloq Hikmət Hacızadə EDNews.net üçün cavablandırıb:

Hikmət Hacızadə: "Seçki komissiyalarının tərkibinə müğənniləri ...

“Mən əfsuslar olsun ki, bu əməliyyatlarda köklü islahat proqramını görə bilmirəm. Bəli, çox müsbət haldır ki, ölkə rəhbərliyi korrupsiyaya qurşanmış məmurları cəzalandırır. Lakin bu cəza kampaniyasını hələlik islahat anlandırmaq olmaz. Üstəlik bəzən cəzalar da tam ünvanlı olmur. Məsələn, Mədəniyyət nazirinin müavinini həbs edirlər, qurumdakı bir neçə rüşvətə qurşanmış vəzifəli şəxsləri həbs edirlər, lakin nazirə dəymirlər. Ola bilməz ki, burada törədilən cinayətdən nazirin xəbəri olmasın. Bu məsələnin sadəcə birinci tərəfidir. Digər tərəfdən həbslərlə iş düzələcəkmi? Bəs icra başçısı həbs edilən rayonlardakı polis rəisləri, prokurorlar, təhsil şöbəsinin rəhbərləri və digər vəzifəli şəxslər necə olacaq? Onlar illərdir rüşvətə alışıblar, bir gündə fəaliyyətlətini şəffaflaşdıracaqlarmı? Başçı ilə alt qurumdakı məmurlar ortaq şəbəkənin ünsürləridir. Şəbəkəni ləğv etmək üçünsə ictimai və media nəzarəti bərpa edilməli və sistemli islahatlar aparılmalıdır. İndiki vəziyyətdə icra başçılarının həbs olunduğu rayonlarda vətəndaşı incidən, vətəndaşdan rüşvət edən bir məmura qarşı vətəndaş nə edəcək? Onu kimə şikayət edəcək? Əvvəlki başçı ilə eyni şəbəkədən olan prokurora, polisəmi? Ona görə də mən bu əməliyyatları hələlik islahat adlandırmıram”.

Azərbaycanda hazırda general rütbəsi daşıyan şəxslərin də həbs edildiyini nəzərə alsaq bu korrupsiyaya qurşanmış bir çox məmur və nazirlər üçün, o cümlədən, bəzi generalallar üçün ciddi narahatlıq doğuran məqamdır. “Vurulmaqdan” qorxan bu məmurların iqtidarın “təmizləmə” əməliyyatlarının qarşısını almaq üçün qruplaşaraq ölkədə bir dövlət çevrilişi və ya təxribatlar törətmə imkanları varmı? sualına H.Hacızadə belə cavab verib:

“Hazırda iqtidarı devirə biləcək mütəşəkkil bir qruplaşma yoxdur, lakin sizin sualınızın fəlsəfəsi çox doğrudur. Bu məsələ araşdırılmalıdır. Çünki bir çevriliş olmasa belə bu məmurlar “vurulmamaq” üçün müxtəlif üsullara əl ata, “təmizləmə”yə müqavimət göstərə bilər. Korrupsiyaya qurşanmış təbəqə Azərbaycanda kifayət qədər genişdir və böyük maaliyyə imkanlarına sahibdir. Əgər bu təbəqə çox incidilsə hökumətdən narazı siyasi qüvvələrə bu və ya digər formada dəstək verə bilər. Mənim yadımdadır ki, 1988-1989-cı illərdə Azərbaycan SSRİ-nin rəhbəri Əbdülrəhman Vəzirova Moskvadan əmr gəlmişdi ki, ölkədəki qurumlarda “təmizlik” işləri aparsın. Xüsusilə Heydər Əliyevə yaxınlığı olan və ya onun tərəfindən vəzifəyə gətirilmiş şəxslər azad edilsin. Bax o dövrdə Ramiz Mehdiyev, Hacıbala Abutalobov, Murtuz Ələsgərov kimi kadrlar Xalq Cəbhəsini bu və ya digər formada dəstəkləməyə başadılar. Bu gün də özünü təhlükədə hiss edən bəzi məmurların müxalif siyasi qüvvələri dəstəkləməsi ehtimalı var”.

Nicat İsmayılov

EDNews.net

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...