Eurasia Diary “Ukrayna gələcək institutu” analitik mərkəzinin beynəlxalq siyasət üzrə eksperti İlya Kusa ilə eksklüziv reportajı təqdim edir.
Sizcə indi Ermənistanda nə baş verir?
- Ermənistanda Baş nazir Nikol Paşinyanın Dağlıq Qarabağdakı aktiv hərbi əməliyyatların sona çatması barədə üçtərəfli sülh bəyanatını imzalamaq qərarı siyasi böhranın yaranmasına səbəb olub. Gözlənildiyi kimi, cəmiyyətin böyük bir hissəsi baş nazirin qərarından narazı qalıb və bu qərardan məyus olub. Onun siyasi mövqeləri zəifləyib və bəzi insanlar istefasını tələb edirlər.
Paşinyanın siyasi taleyi necə olacaq? O, niyə gizlənir?
- Onun gizləndiyi barədə heç yerdə məlumat görməmişəm. O, millət vəkillərinin Qarabağa dair razılaşma ilə bağlı suallarını cavablandırmaq üçün parlamentə gəldi. Fikrimcə, ən azından siyasi mövqeləri xeyli zəifləyəcək və hökumətdə kadr dəyişiklikləri aparılacaq. Paşinyan maksimum istefa verə bilər və Ermənistanda hökumət dəyişəcək.
Ermənilərin işğal etdikləri əraziləri tərk edərkən hər şeyi (evləri, mal-qaranı və s.) özlərindən sonra yandırmalarını necə şərh edə bilərsiniz?
- Burada təəccüblü bir şey yoxdur. Ermənilər üçün Azərbaycan ordusu işğalçıdır, ona görə də əhali, işğalçılara heç nə qala bilməz düşüncəsiylə, Azərbaycan qüvvələrinin gəlməsinə bu cür reaksiya verir.
Ermənistanda vətəndaş müharibəsi mümkündürmü?
- Düşünürəm ki, bu az ehtimal olunan ssenaridir. Ermənistandakı siyasi qüvvələrin belə bir konfliktə ehtiyacı yoxdur. Düşünürəm ki, hər şey hökumətin istefasına qədər siyasi sarsıntı və kadr dəyişikliyi ilə bitəcək, başqa heç nə.
Nə üçün ermənilər Rusiyanın onlara xəyanət etdiyini düşünür?
- Mən deməzdim ki, ermənilər belə düşünür. Bu mövzuda çox fərqli fikirlər var, buna görə birmənalı olaraq ermənilərin “Rusiya xəyanət etdi” düşüncəsində olmasını söyləməyə dəyməz. Bu cür düşüncələr, bəlkə də, cəmiyyətin bir hissəsində var və ehtimal ki, Rusiya Federasiyası ilə Ermənistan arasında on illərdir davam edən tərəfdaşlığın hədsiz gözləntiləri ilə əlaqəlidir. Ancaq fikrimcə, bir çox erməninin Rusiyanın rolu ilə bağlı xüsusi illüziyaları yoxdur. Rusiyanın Qarabağda strateji maraqları yox idi, ümumilikdə bölgədə və xüsusən də Ermənistanda siyasi təsirini qorumaqda maraqlıdır.
Müsahibəni aldı: Cəmilə Çebotareva
Tərcümə etdi: Gülnar Səlimova