Makronun Hz. Məhəmmədin karikaturasının nəşrinə dair çıxışının əsas məqsədi cəmiyyətin dünyəviliyinin Fransa Respublikasının təməl dəyərlərindən biri olduğunu və heç bir dəyişikliyə məruz qala bilməyəcəyini vurğulamaq idi.
Bunu “Eurasia Diary”yə müsahibəsində Rusiya Xalqlar Dostluğu Universitetinin (RUDN) beynəlxalq münasibətlər nəzəriyyəsi və tarixi kafedrasının professoru Konstantin Kurılyov deyib.
Fransa parlamentində "Qlobal təhlükəsizlik haqqında" qanun layihəsini müzakirə etmək ehtiyacı nədən yarandı?
- Polis zabitlərinə qarşı video çəkilişdən istifadənin müzakirəsi 1994-cü ildən bəri davam edir.
Polisin lehinə yeni qaydalar təklif edən qanun layihəsinin Senat tərəfindən qəbul edilməsi ehtimalı nə qədərdir və bunun nəticəsi necə ola bilər?
- 32 maddədən ibarət qanun və xüsusən də ən çox müzakirə olunan 24-cü maddə artıq parlament tərəfindən qəbul edilmişdir. Hal-hazırda, ölkənin müxtəlif yerlərində müxtəlif hesablamalara görə 133 ilə 500 min arasında insan küçələrə çıxıb. Etirazlara əsasən insanlar, azadlıqlarının məhdudlaşdırılmasına və eyni zamanda polisin daha çox hərəkət azadlığına səbəb olan qanunun ləğvini tələb edirlər. Bununla əlaqədar olaraq, 30.12.2020-ci il bazar ertəsi günü 24-cü maddənin mətninə yenidən baxılmasına qərar verildi.
Hələ qanun qəbul edilməmişdən öncə polis çəkilişlərə qarşı çıxırdı, ancaq indi maddənin birinci hissəsinə görə 45 min avroya qədər cərimə də edə bilərlər. İkinci hissə jurnalistlərə münasibətdə dəyişiklikləri nəzərdə tutur. Beləliklə, onlar çəkiliş üçün icazə istəməli olacaqlar. Eyni zamanda, qanunun əsas məqsədi, dövlət məmurları tərəfindən bildirildiyi kimi, son zamanlarda Fransada baş verən polisi və ailələrini onlara qarşı artan təzyiqlərdən qorumaqdır.
Demokratik bir ölkə olan Fransanın antidemokratik və avtoritar bir ölkəyə çevrilməsini necə izah edərdiniz?
- Bu qanunun ləğvini dəstəkləyənlərin əksəriyyətinin səsləndirdiyi ifadədir. Dövlətin bu siyasəti qismən, son illərdə baş verən bir sıra terror hücumları və müəllim Samuel Patinin öldürülməsi ilə izah edilə bilər.
Makron hökumətinin ölkənin iqtisadi, qaçqınlarla bağlı və digər daxili problemlərini həll etməsinə nə mane olur?
- Makron hökumətinin qarşısında bir sıra çətin vəzifələr durur. Hazırda o, qaçqınlara yönəlmiş şiddətə qarşı çıxaraq Parisdəki müvəqqəti çadırlarını dağıdan polisin son əməliyyatını qınadı. Bundan əlavə, daha əvvəl bağlanmağa məcbur olan ticarət obyektləri, restoranlar, kafelərin və s. və ya ikinci karantin rejiminin tətbiq edilməsi səbəbindən hələ də bağlı olan restoran və kafelərin aylıq təzminat ödənilməsi yolu ilə dəstəklənməsi davam edir. Eyni addım, koronavirusla əlaqəli işini dayandıran bir sıra insanlara münasibətdə də atılır. Məsələn, ofisiantlara hər ay maaşlarının təxminən 80% -i ödənilir.
2022-ci il prezident seçkiləri mövcud hadisələrə necə təsir edəcək?
- Makron artıq indidən sağçıların qələbəsinin qarşısını almaq üçün təhlükəsizlik islahatları həyata keçirmək məcburiyyətindədir. Bununla o, hazırda əhali arasında populyarlıq reytinqindəki itkilərini kompensasiya etmiş olur.
Makronun təcavüzkar xarici siyasəti diqqəti daxili problemlərdən yayındırmaq üçündür, ya necə?
- Fransanın xarici siyasətini təcavüzkar siyasət hesab etmirəm.
Müsahibəni aldı və tərcümə etdi: Gülnar Səlimova
*Məqalədəki fikirlərə görə redaksiya məsuliyyət daşımır