Dekabrın 27-də işğaldan azad edilmiş Xocavənd rayonunun Ağdam kəndində baş vermiş növbəti erməni hücumunun qarşısını alarkən Azərbaycan ordusunun 1 hərbiçisi şəhid oldu, 1 hərbiçi yaralandı. Dağlıq Qarabağda baş verən təxribatlar və təhlükəsizlik məsələsi mövzusunda politoloq Zaur Məmədov Eurasia Diary-yə şərh verib.
“Bu təxribatların olması bir daha onu sübut edir ki, Cənubi Qafqazda Ermənistan və Azərbaycan arasındakı münaqişə Ermənistanda olan müxtəlif revanşist qüvvələrlə yanaşı, dünyadakı ayrı-ayrı qlobal güclərin də öz maraqlarını reallaşdırması ilə üz-üzədir. Amma biz Azərbaycan cəmiyyəti olaraq çox yaxşı bilirik ki, Azərbaycanın güclü ordusu var və Azərbaycanın siyasi rəhbərliyi bu kimi həmlələrin və təxribatların qarşısını necə alırdısa bundan sonra da alacaq. Azərbaycan güclü dövlətdir. Hərbi-siyasi istiqamətdə düşmənə və onun havadarlarına 44 günlük müharibədə gözdağı verməyi bacardı və bundan sonra da verəcək.
Ümumilikdə, Hadrudun bu bölgələri kifayət qədər strateji önəm kəsb edən bölgələrdir. Orada meşələrdə həm gizlənmək asandır, həm də bu bölgələr Şuşanın, Xankəndinin və Laçın dəhlizinin yaxınlığında yerləşir. Hər bir halda, bu kimi qrupların provokasiyaları onlar özləri də bilir ki, nəticə verməyəcəkdir. Azərbaycan ordusu əgər 44 gün ərzində erməni ordusunu məhv edibsə, o zaman bu kimi silahlı birləşmələri məhv etmək ümumiyyətlə asan məsələdir və bizim üçün heç bir çətinlik törətməyəcək”, Z.Məmmədov qeyd etdi.
Politoloq sülhməramlıların fəaliyyəti və onların üzərinə düşən məsuliyyət barədə fikir bildirdi.
“Rusiya sülhməramlıları bölgədə münaqişənin həll edilməsində əsas məsuliyyət daşıyan tərəfdir. Çünki onların sülh məramı da məhz Ermənistan silahlı birləşmələrinin və bütün erməni silahlılarının Dağlıq Qarabağdan çıxarılmasından sonra məlum olacaqdır. İndiki halda görüləsi iş çoxdur və yaxşı olardı ki, sülhməramlılar Rüstəm Muradovun başçılığı altında humanitar sahədə Qarabağın abadlaşdırılması, bölgəyə ermənilərin gətirilməsindənsə real olaraq üzərinə düşən öhdəlikləri yerinə yetirsinlər.
2021-ci ildə biz artıq kommunikasiyaların bərpası, eyni zamanda bölgədə qarşılıqlı əlaqələrin bərpa edilməsinin şahidi ola bilərik. Bu da təbii ki, Rusiyanın apardığı siyasətdən, eyni zamanda Ermənistan daxilindəki vəziyyətdən birbaşa asılı olacaq. Əgər Ermənistanda növbədənkənar seçkilər baş verəcəksə bu bir müddət Cənubi Qafqazdakı sülh prosesini uzada bilər, amma ümumilikdə Ermənistanda hakimiyyətə gələcəkdə kimin gəlməsindən asılı olmayaraq, artıq Paşinyanın timsalında ölkə rəhbərliyi Azərbaycanın ərazi bütövlüyünü “de-yure” tanıyıb və Ermənistanın müxtəlif siyasi rəhbərləri və qrupları artıq bunu beyinlərinə həkk etməlidirlər”, politoloq fikrini tamamladı.
Gülnar Səlimova
