Türk sülhməramlı qüvvələrinin Azərbaycanda yerləşdirilməsi Bakının qərarıdır, Moskvanın deyil. Türk sülhməramlı qüvvələrini Qarabağda yerləşdirməklə Azərbaycan Rusiyanın bölgədəki təsirini tarazlaşdırmağa çalışır - deyə Avrasiya məsələləri üzrə amerikalı analitik Pol Qobl bildirib.

Eurasia Diary xəbər verir ki, Pol Qobl, ABŞ dövlət katibinin Sovet milli məsələləri və Baltikyanı məsələlər üzrə xüsusi məsləhətçisi vəzifəsində çalışmışdır.

Amerikalı jurnalist Coan Lisoski, Dağlıq Qarabağ münaqişəsi ətrafında mövcud vəziyyət və regional güclərin bu münaqişədəki rolu ilə bağlı Pol Qobldan müsahibə alıb.

Qobl müsahibəsində Türkiyənin dünya arenasındakı gücü, türk sülhməramlı qüvvələrinin Azərbaycanda yerləşdirilməsi, Rusiyanın sülhməramlı qüvvələrinin Dağlıq Qarabağdakı rolu, ABŞ-ın Bayden administrasiyası dövründə post-sovet məkanında gələcək fəaliyyəti, Qarabağın dağılmış ərazilərinin bərpası və Ermənistanla Azərbaycan arasında Dağlıq Qarabağ münaqişəsinə dair sülh sazişi üzrə növbəti onillikdə aparılan danışıqlar kimi bir sıra vacib məsələlərdən bəhs edib.  

Qobl hesab edir ki, türk sülhməramlı qüvvələrinin Azərbaycanda yerləşdirilməsi Ankara ilə Moskva arasında razılaşdırılmamışdı, bu, Azərbaycan hökumətinin qərarı idi.

"Türk sülhməramlı qüvvələrinin Azərbaycanda yerləşdirilməsi Bakının qərarıdır, Moskvanın deyil. Türk sülhməramlı qüvvələrinin Qarabağa yerləşdirilməsi ilə Azərbaycan Rusiyanın bölgədəki təsirini tarazlaşdırmağa çalışır", o dedi.

"Sabah və ya bir sonrakı gün rəsmi Bakı ərazisinin hansısa hissəsində türk hərbi bazasının olmasını istədiyinə qərar verərsə, Azərbaycanın buna suveren haqqı var", o dedi.

Azərbaycan, Ermənistan və Rusiya tərəfindən atəşkəs və Qarabağdakı hərbi əməliyyatların dayandırılması barədə 10 noyabrda imzalanan üçtərəfli bəyannaməyə toxunan Qobl, noyabr bəyannaməsinin tam hüquqlu bir razılaşma olmadığını qeyd etdi.

"Noyabr ayından bəri üçtərəfli bəyannamənin müqavilə olmadığını söyləyirəm. Müqavilə daha çox səhifədən ibarət olmalı və iki tərəf arasında mübahisəli məqamları göstərməlidir", o dedi.

Bundan əlavə, Qobl hesab edir ki, Rusiya Ermənistan-Azərbaycan, Dağlıq Qarabağ münaqişəsindən bəhrələnən ölkədir.

"Otuz ildir ki, Qarabağ mübahisəsi ilə bağlı razılaşmanın olmamasının sadə bir səbəbi var. Bu sadə səbəb ATƏT-in Minsk qrupunun həmsədrlərindən birinin münaqişənin nizamlanmasında maraqlı olmamasıdır. Çünki, qrup üzvlərindən biri güman edir ki, sülh yolu ilə həllin axtarışı hələ sizin axtarışda olduğunuzu ifadə etmir. Bəzi ölkələr bu gərginlik və qarşıdurmadan faydalanır", deyə o vurğuladı.

"Cənubi Qafqazda münaqişənin sülh yolu ilə həll olunması Rusiyanın istədiyi şey deyil. Təsəvvür edək ki, sabah Ermənistanla Azərbaycan arasında bir-birlərini tanımaq barədə razılaşma əldə olunarsa, Ermənistanla Azərbaycan arasındakı sərhəd normal beynəlxalq sərhəd halına gələrsə, Ermənistan və Azərbaycan şərq-qərb nəqliyyatı barədə razılığa gələrsə, bundan ən çox itirən Rusiya olacaq", o dedi.

Bundan əlavə, amerikalı ekspert Ermənistan və Azərbaycan arasında danışıqların müxtəlif səviyyələrdə aparılmalı olduğunu vurğuladı. Onun sözlərinə görə, Qarabağ mübahisəsi ilə bağlı danışıqların təkcə prezidentlər səviyyəsində aparılması dayandırılmalıdır və danışıqların nazirlər, səfirlər, biznes səviyyələrində aparılmasına ehtiyacı var.

Qobl Ermənistan-Azərbaycan münaqişəsi ilə bağlı sülh sazişi üzrə danışıqlar üçün gələcək imkanların olmadığını da vurğuladı.

Eurasia Diary videonu təqdim edir: