Avropa İttifaqı rəsmiləri Türkiyə ilə Aİ arasındakı əlaqələrin möhkəmləndirilməsi məqsədilə qardaş ölkəyə səfər ediblər. Ölkəyə rəsmi səfər edən yüksək səviyyəli Avropa İttifaqı rəsmilərini Prezident Rəcəb Tayyib Ərdoğan çərşənbə axşamı öz iqamətgahında qəbul edib. 

Təxminən üç saat davam edən görüşdən sonra Aİ Şurasının rəhbəri Şarl Mişel və Aİ Komissiyasının rəhbəri Ursula fon der Lyayen mətbuat konfransında iştirak ediblər. Konfransda çıxış edən Ş.Mişel Aİ-nin iqtisadiyyat və immiqrasiya və cəmiyyətlərarası əlaqələr mövzusunda əməkdaşlığı gücləndirmək üçün konkret bir gündəm təqdim etməyə hazır olduğunu bildirib. O, Aİ-nin Türkiyə ilə qarşılıqlı faydalı və müsbət münasibətlərin strateji əhəmiyyəti, eləcə də Aralıq dənizindəki təhlükəsizlik və sabitliyin önəmli məsələ olduğunu vurğulayıb.  

Ursula fon der Lyayen bu səfərin Türkiyə-Aİ əlaqələrinə bir təkan vermə məqsədini daşıdığını vurğulayaraq, Ərdoğanla görüşləri zamanı qarşılıqlı faydalı əməkdaşlıqdan söz açıb. 

Önəmli olan budur ki, öncə sanksiya ritorikası ilə çıxış edən Aİ indi Türkiyə ilə daha yumşaq davranmağa başlayır. Bəs görəsən bunun arxasında dayanan səbəb nədir. Bu barədə Eurasia Diary-yə açıqlama verən politoloq Engin Özerin sözlərinə görə Aİ-nin Türkiyədən umduğu bir çox məsələlər var ki, bunlardan da biri suriyali qaçqınlar məsələsidir. 

“Aİ suriyalı qaçqınlar məsələsində hər hansı bir problemin ortaya çıxmasından bərk narahatdır. Qaçaq yollarla baş verən kütləvi axın xüsusilə Yunanıstan sərhədlərində də gərginlik yaradır. O üzdən də Aİ Türkiyənin suriyalı qaçqınları bir müddət təmin edəcəyi maddi yardımlarla ölkəsində müsafir etəməsini istəyib. Bundan əlavə, Aİ Türkiyənin həm quruda, həm də dənizdəki sərhəd qoşunlarının nəzarəti gücləndirməsinin vacibliyini bildirib” – deyə ekspert vurğulayıb. 

Onun sözlərinə görə, Aİ nümayəndələri İdlibdə baş verən və gələcəkdə də olması istisna edilməyən yeni qarşıdurmalar nəticəsində növbəti qaçqın axınının güclənməsindən narahat olduqlarını qeyd ediblər. Buna görə də, görüş zamanı Türkiyədən sərhədlərdə nəzarəti artırmaq xahiş olunub.  

Digər müzakirə olunan bir məsələ rəsmi Ankaranın Aralıq dənizində qaz istismarı mövzusunda Cənubi Kipr və Yunanıstanla razılığa gəlməsi ilə bağlı olub. Engin Özer bildirib ki, Türkiyə qaz istismarı məsələsində dialoqa və açıq bazarlığa “hə” deyir: “Baydenin hakimiyyətə gəlişindən sonra rəsmi Ankaranın Aİ ilə münasibətləri əvvəlki qədər kəskin deyil.  Bu səbəblə də Ankara Aİ ilə bütün sahələrdə razılığa gəlməyə hazırdır”. 

Engin Özer görüşün nəticəsi ilə əlaqədar olaraq Türkiyənin yaxın gələcəkdə siyasi baxışlarının hansı yöndə dəyişə bilməsi, eləcə də Aralıq dənizində Yunanıstanla münasibətlərin hansı formada davam edəcəyi barədə fikir bildirib: “Məlum olduğu kimi, Türkiyə pandemiya ilə əlaqədar ciddi böhranla mübarizə aparır. Hətta bu böhranın daha kəskinləşə biləcəyi gözlənilir. O üzdən də Türkiyənin qarşısında xarici ticarəti genişləndirmək kimi bir öhdəlik dayanır. Bunu nəzərə alsaq, Türkiyənin ölkədə, xüsusilə də avropalı investorları cəlb edə bilməsi şərtdir. Bu baxımdan Türkiyə hər vasitə ilə Yunanıstana yaxın olmağa çalışacaq. Digər bir tərəfdən, Türkiyənin gömrük məsələsində öz xeyrinə Aİ ilə daha avantajlı razılığa gəlmək istəməsi yaxın gələcəkdə Türkiyənin qərbə meyllənməsindən xəbər verə bilər”.