Dünən gecə radələrində Rusiyanın Rostov şəhərindən qalxan təyyarə Bakıdan keçərək Ermənistanın Erebuni hava limanına eniş edib. Erməni mətbuatı Azərbaycanın həbs etdiyi terrorçuların gəlməsini xəbər versə də, təyyarədə onlardan əsər-əlamət olmayıb. Təyyarədə ancaq Rusiya sülhməramlı kontingentinin komandanı general Rüstəm Muradov olub.

Baş verən hadisə bir çox suallar və müəmmalar yaradır. Mətbuatda verilən məlumatlardan çıxış edərək, mülahizə irəli yürütdükdə anlaşmazlığın olduğunu bilmək olar. Bu gün isə Azərbaycana Rusiyanın Baş prokuroru İqor Krasnovun gəlişi də xüsusi diqqət çəkən məqamlardan biridir.

Eurasia Diary Ermənistana gələn boş təyyarənin pərdəarxası məqamları ilə politoloq Adıgözəl Məmmədovun fikirlərini alıb.

Politoloq bu hadisədə Azərbaycanın irəli sürdüyü öhdəliklərin yerinə yetirilməməsini səbəb kimi göstərib.

“Azərbaycan və Ermənistan nümayəndələrinin Rusiya səlahiyyətləri arasında gedən danışıqlar qısa müddət ərzində aparılmır. Bu proses bəlkə də 20 gündən artıq müddətdir ki, gedir. Moskvada ümumi danışıqlar, onun predmeti, qarşılıqlı istəklər, yəni Azərbaycan nəyin müqabilində girovları qaytara bilər kimi məsələlər müzakirə olunur. Hiss olunan odur ki, Azərbaycan tərəfi qarşısında götürülən öhdəliklər son məqamda pozulub. Çünki bu bir-iki gün ərzində müzakirə edilə bilən və həll olunan problem deyil. Tərəflərin rəhbərliyi səviyyəsində müzakirələrdə yaranan razılığın pozulmasını səbəb kimi görürəm. Burada isə uduzan tərəf Ermənistandır. Rusiyanın özünü də pis vəziyyətdə qoyur”, deyə politoloq qeyd edib.

Adıgözəl Məmmədov Azərbaycanın dövlətimizə, milli təhlükəsizliyimizə təhdid yaradan silahlıları beynəlxalq hüquqa, Cenevrə İnsan Hüquqları Konvensiyasına görə terrorçu kimi mühakimə etmək ixtiyarı olduğunu bildirib. O, praktikada fərqli təcrübələrin də olduğunu deyib: “Lakin beynəlxalq praktikaya baxsaq, bu cür məsələlərin milli maraqlar çərçivəsində müzakirə predmetinə çevrildiyini görə bilərik. Faktiki olaraq, Ermənistan tərəfi son məqamda miskin niyyətini əl çəkməyib. Azərbaycanın hansı tələbi irəli sürdüyünü biz bilmirik. Lakin faktiki olaraq Ermənistan tərəfi son məqamda miskin niyyətini əl çəkməyib. Burada mina xəritəsi, müəyyən mövqelərdən geri çəkilməsi, Laçın koridorunda Azərbaycanın icazəsi olmadan hansısa qüvvənin keçməsinə imkan verilməməsi və hətta bundan yüksək tələblər də ola bilər. Cənab prezident Rusiya sülhməramlılarına Laçın koridoru ilə bağlı öz iradını bildirmişdi. Bu da tələblər içərisindədir. Azərbaycanın strateji maraqları var və bu istiqamətdə çox ciddi hazırlıqlar gedir. Şərtlərə əməl olunmasa Azərbaycan daxil olmaqla digər tərəflər bəyannamədən çıxa bilər. Bu Azərbaycanın tam hüququdur. Çünki bu sənəddə dövlət başçılarının imzaları var, onlar öhdəliklər və səlahiyyətlər götürüblər”.

Şuşada “İskəndər” raketinin qalıqlarının tapılması, Rusiya müdafiə nazirinin müavini general Dimitri Bulqakovun Qarabağa səfəri kimi son baş verən hadisələri nəzərdən keçirərək, Azərbaycan ilə Rusiya arasında narazılığın olduğunu söyləyənlər var. Politoloq iki ölkə arasında münasibətlərin həmişə rəvan olmadığını vurğulayıb.

“Azərbaycan öz milli maraqlarından çıxış edərək Rusiya ilə mövcud reallıqlardan baxımından məntiqi münasibətlər saxlayıb. Zaman-zaman bu münasibətlər çox sıx əməkdaşlıq səviyyəsinə də qalxıb. Müəyyən vaxtlarda isə Azərbaycan öz kəskin sözünü deyib. Rusiyanın mövqeyini nəzərdən keçirək. Ermənistan daxilində ictimai siyasi qüvvələrin 90%-i anti-Rusiya meyllidir. Hətta erməni politoloqlarının böyük əksəriyyəti 44günlük müharibədə məğlubiyyəti Rusiyanın üzərinə yıxır ki, onlara dəstək verməyib. Qeyd edək ki, Rusiya yalnız KTMT çərçivəsində Ermənistan ərazisinə hücum olardısa müdaxilə edə bilərdi. Ermənistanın mövcud reallığında ruspərəst dairələrin hakimiyyətə gəlməsi müşkülə çevrilib. Moskva anti-Rusiya qüvvələrlə işləmək məcburiyyətində qalıb. Bəzi qüvvələr isə Ermənistan dövlətçiliyinin ölməsini bəyan edərək Rusiyanın tərkibinə girməyə də razıdırlar. Buraya Ermənistan Elmlər Akademiyasının üzvləri də daxildir. Kreml bu qüvvələrin də baxışlarını hesablayaraq regionda öz siyasətinə düzəliş etməyə çalışır. Bəzən Rusiyanın korrektə etdiyi siyasət mövcud bəyannamənin şərtləri ilə uyğun düşmür. Bu da əlbəttə ki, Azərbaycan tərəfinin narazılığına səbəb olur”, deyə Adıgözəl Məmmədov fikrini bitirib.

Ülvi Əhmədli