Mina məsələsinin alternativi yoxdur - Azərbaycan özü hərəkət etməlidir | Eurasia Diary - ednews.net

25 İyul,


Mina məsələsinin alternativi yoxdur - Azərbaycan özü hərəkət etməlidir

Analitika A- A A+

Rusiya Xarici İşlər Nazirliyinin mətbuat katibi Mariya Zaxarova mətbuat konfransında erməni işğalından azad edilmiş torpaqlarda mina təhlükəsi məsələsinə toxunub.

Bu problem ilə bağlı açıqlama verən Zaxarova Rusiyanın iştirakı ilə Ermənistan və Azərbaycan arasında mina təhlükəsinin həll edilməsinin vacibliyini vurğulayıb. Mətbuat katibi, üçtərəfli komissiyanın fəaliyyətinin bərpa ediləcəyinə ümid etdiyini bildirib. Mariya Zaxarova, həmçinin mina xəritələrinin ortalığa çıxarılmasının zəruri olduğunu da qeyd edib.

Qeyd etmək lazımdır ki, Azərbaycanın ciddi səylərindən sonra Rusiya daxil olmaqla ABŞ və bir sıra dövlətlər artıq mina məsələsinə diqqət yetirməyə başlayıblar. Ermənistan və Azərbaycan arasında sülh prosesinin aktivləşməsində mina məsələsinin ciddi mövzulardan birinə çevrildiyi aydın görünür.

Eurasia Diary bu məsələ ilə bağlı politoloq, Atlas Araşdırmalar mərkəzinin sədri Elxan Şahinoğlu ilə danışıb.

Elxan Şahinoğlu ilkin olaraq qeyd edib ki, mina təhlükəsi məsələsi Azərbaycan üçün ən vacib məsələlərdən biridir: “Erməni işğalından azad edilmiş torpaqları minalardan təmizləmək ölkəmiz üçün əsas prioritetlərdən biridir. Çox təəssüf ki,  Ermənistan mina xəritələrini Azərbaycana təhvil vermir və məsələni uzadır. Ermənistana bu məsələdə heç kəs təzyiq göstərmir”.

Politoloq hesab edir ki, beynəlxalq aləmin mina məsələsində səssiz qalmasına baxmayaraq, Azərbaycanın çox ciddi addımları nəticəsində bu məsələyə müəyyən reaksiyalar yaranmağa başlayıb.

“Uzun müddət Rusiya və beynəlxalq aləm bu məsələyə səssiz qaldı. Amma son zamanlar ölkəmizin səyləri nəticəsində müəyyən reaksiyalar eşidirik. Birinci reaksiyanı Amerikalı diplomat Filip Riker Azərbaycana səfər zamanı səsləndirib. Riker mina xəritələrinin Azərbaycana təhvil verilməsini vacib hesab edib. Daha sonra Rusiyanın Xarici İşlər Nazirliyinin mətbuat katibi Mariya Zaxarova da bu məsələyə toxundu. O da mina probleminin həllinin zəruri olduğunu vurğulayıb” – deyə politoloq qeyd edib.

Elxan Şahinoğlu bu problemin uzanmasının səbəbini Moskvanın Ermənistana ciddi şəkildə təzyiq göstərməməsi ilə əlaqələndirib. 

“Ermənistan Rusiyadan asılıdır. Moskva istəsə Ermənistandan mina xəritələrini ala bilər. Lakin hələ də bu addımı atmır. Buradan aydın olur ki, Rusiyada müəyyən qüvvələr bu problemin həll olunmasını istəmirlər. Azərbaycanın itkilərinin artmasında maraqlıdırlar” – deyə o, vurğulayıb.

Sonda Şahinoğlu mina problemin Azərbaycanın özü həll etməli olacağını qeyd edib:  “Görünür, bu məsələni özümüz həll etməli olacağıq. Torpaqlarımızın böyük hissəni işğaldan özümüz azad etməli olduq. Beynəlxalq aləm bu 30 ildə Ermənistana heç bir təzyiq göstərmədi. Mina məsələsində də özümüz Ermənistana təzyiqləri artırmalıyıq. Hesab edirəm ki, bunun başqa alternativ yoxdur”.

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...