Ermənistanda parlament seçkiləri başa çatdıqdan və nəticələr bəlli olduqdan sonra Qarabağa dair üçtərəfli bəyannamə üzrə fəaliyyətin sürətlərdirilməsi istiqamətində addımların atıldığının şahidi oluruq.
İyunun 23-də Azərbaycan Respublikasının Prezidenti İlham Əliyev Rusiya Federasiyasının Prezidenti Vladimir Putinə telefonla zəng edib. Telefon söhbəti zamanı Cənubi Qafqazda iqtisadi əlaqələrin və nəqliyyat kommunikasiyalarının bərpası üzrə üçtərəfli formatda işin fəallaşdırılmasına xüsusi diqqət yetirilib. İyunun 24-də isə Ermənistan Baş naziri vəzifəsini icra edən Nikol Paşinyan Rusiya prezidenti Vladimir Putinlə telefon danışığı aparıb. Tərəflər bölgədəki vəziyyətə, 10 noyabr 2020 və 11 yanvar 2021 tarixli üçtərəfli bəyanatların müddəalarının həyata keçirilməsinə də toxunublar.
Dünən Türkiyə Prezidenti Rəcəb Tayyib Ərdoğanla rusiyalı həmkarı Vladimir Putin arasında telefon danışığı olub. Prezident Ərdoğan Ermənistanın hazırda sülh və əməkdaşlığa diqqət yetirməli olduğunu və Rusiya, Ermənistan və Azərbaycan liderlərinin 10 noyabr 2020-ci il və 11 yanvar 2021-ci il tarixli bəyanatlarında təsbit olunmuş razılaşmaların tam şəkildə həyata keçirilməsinin zəruriliyini vurğulayıb.
Qeyd edək ki, danışıqlar fonunda 30 iyulda Moskvada Türkiyə ilə Rusiya arasında ticarət həcminin artırılması üçün müzakirələr keçiriləcək.
Maraqlıdır liderlərin danışıqlarında müşahidə olunan bu intensivlik hansı məqsədə xidmət edir?
Mövzu ilə bağlı politoloq Elxan Şahinoğlu Eurasia Diary-yə açıqlama verib.
“Nikol Paşinyan Ermənistanda keçirilən parlament seçkilərində qələbə çaldıqdan sonra danışıqlar intensivləşib. Azərbaycan Prezidenti ilə Rusiya Prezidenti, Rusiya Prezidenti ilə Türkiyə Prezidenti və Rusiya Prezidenti ilə Ermənistanın baş naziri arasında müxtəlif telefon danışıqları olub. Azərbaycan hakimiyyətinin qərarı belədir ki, Paşinyanın qələbəsindən sonra prosesləri sürətləndirməyə ehtiyac var. Zəngəzur dəhlizinin açılması və s. məsələlər əlbəttə ki, həll olunmalıdır. Rusiyanın Ermənistana təsir imkanları böyükdür. Ona görə, Rusiya Prezidenti ilə danışılıb ki, bu məsələlər sürətləndirilsin. Əgər Paşinyan bölgədə sülh və əmin-amanlıq, əməkdaşlıq istəyirsə, bu məsələləri həll etməlidir: Zəngəzur dəhlizinin açılmasına imkan yaratmalı, minalanmış xəritələri Azərbaycana təhvil verməli və Azərbaycan və Türkiyə ərazi bütövlüyünü tanımalıdır. Bütün bu addımlar atılsa, Azərbaycan da qarşılıqlı addımlar atacaq. Türkiyə ilə sərhəd açıla bilər. Bu, Ermənistanın regional layihələrə qoşulmaq imkanlarını artıracaq. Həmçinin, bu Rusiyanın və İranın da maraqlarına uyğundur, çünki Ərdoğanın altılıq formatı təklifi var, bu format işə düşəcək", - deyə politoloq qeyd edib.
Ekspertin sözlərinə görə, haradan baxsaq, Ermənistanın atacağı addımlar bölgə və Ermənistan üçün çox faydalıdır.
“Yetər ki, Paşinyan bu addımları atsın. Paşinyanın quracağı hökumətdən, nazirlərinin kim olacağından da çox şey asılıdır. Təyin etdiyi nazirlər də, o cümlədən, xarici işlər və müdafiə nazirləri gərək Azərbaycan və Türkiyə əleyhinə təxribatçı açıqlamalar verməsin. Çünki bu da dialoqa mane ola bilər. Bizim qarşımızda duran əsas vəzifə Zəngəzur dəhlizinin açılması və 44 kilometrlik dəmir yolunun bərpasıdır ki, Türkiyə-Azərbaycan-Naxçıvan və Mərkəzi Asiya arasında rabitə yaransın.
Rusiya da maraqlı cavab verir. Rusiya bu dəmir yolu üzərində Ermənistana, Türkiyəyə və digər dövlətlərə çıxış imkanı qazanır. Əsas mövzu Zəngəzur dəhlizidir və bütün telefon danışıqlarında məhz bu məsələ ön planda olub", - deyə E. Şahinoğlu bildirib.
Gülnar Səlimova