Hələlik yalnız Türkiyə tərəfindən tanınan Şimali Kipr Türk Respublikası iyulun 20-də müstəqilliyinin 47-ci ilini qeyd edəcək. 1974-cü ilə qədər yunanların tam nəzarətində olan adada türk toplumuna qarşı soyqırım həyata keçirilməyə cəhd edilib. Türkiyənin dərhal “Ayşə tətilə getsin” adı altında həyata keçirdiyi hərbi əməliyyat nəticəsində ada yunan və türk hissələrinə bölünüb. Hazırda Kipr adasının təxminən 33 faizi türklərin nəzarəti altındadır.
Türkiyə mediası xəbər verir ki, iyulun 20-də keçiriləcək rəsmi tədbirlərdə Türkiyə Respublikasının prezidenti Rəcəb Tayyib Ərdoğan da iştirak edəcək. Prezident Ərdoğan 19 iyul tarixində başlayacaq səfər zamanı Şimali Kipr parlament nümayəndələri qarşısında sürpriz bir açıqlama verəcəyini bəyan edib. Bu xəbər hazırda Türkiyə, eləcə də Kiprə böyük marağı olan ölkələr arasında ciddi şəkildə şərh edilir – sürpriz nə ola bilər?
Eurasia Diary-yə açıqlama verən siyasi jurnalist Gökhan Gülər bu sürprizin iki məsələ ilə bağlı ola biləcəyini güman edir. Onun sözlərinə görə, bu görüş artıq Şimali Kipr Türkiyə Respublikasının müstəqilliyinə doğru həlledici an ola bilər.
“Hesab edirəm ki, bu sürpriz "Kipr Türk Dövləti" adı ilə status qazanmağımızın bir işarətidir. Ümid edirəm ki, bu, müstəqilliyin tanınması məsələsidir. Ortaya ya Tayvan, ya da Kosovo modeli qoyula bilər”, - deyə jurnalist qeyd edib.
Gülər həmçinin Şimali Kiprin muxtariyyət əldə edə bilməsi ilə də bağlı proqnozlarını açıqlayıb: “Ən çox arzuladığım, ŞKTR-nin müstəqil bir dövlət kimi tanınmasıdır. Əgər ilkin mərhələdə tam müstəqilliyin tanınması həyata keçirilə bilmirsə, vaxt itirmədən muxtar dövlət statusu verilməlidir. Muxtar dövlət modeli ilhaq etmək və ya vilayət olmaq demək deyil. Hər şeydən əvvəl bunu daha dərindən anlamaq gərəkdir. Bu gün muxtar dövlət modelinin ən yaxşı nümunəsi Birləşmiş Krallıqdır. Birləşmiş Krallıqda yerləşən Uels, Şotlandiya və Şimali İrlandiya bu xüsusda nümunə ola bilər.
Düşünürəm ki, yaxın gələcəkdə xarici əlaqələrimizi və müdafiə sistemimizi Türkiyəyə birləşdirə, dünya ictimaiyyətinə özümüzü Şimali Kipr Türk Respublikası kimi tanıda bilərik.
Bu xüsusda həm ŞKTR-nin "İslam Kipr Türk Dövləti" adı altında İslam Əməkdaşlıq Təşkilatında təmsil olunması, həm də beynəlxalq pasportlara və şəxsiyyət vəsiqələrinə kodlar verən "ICAO" təşkilatının ŞKTR-nı "Kipr Türk Cümhuriyyəti" olaraq qeydə alması təsadüf deyil”, - deyə jurnalist vurğulayıb.
Göghan Gülər həmçinin Azərbaycan parlament nümayəndələrinin Şimali Kiprdəki tədbirə ilk dəfə qatılmalarının önəmi barədə söz açıb. O, azərbaycanlı deputatların ŞKTR-yə ilk rəsmi səfərini qardaşlıq bağlarının daha da möhkəmlənmə simvolu olduğunu qeyd edib: “Bu arada azərbaycanlı qardaşlarımızın belə bir tədbirdə bizimlə birgə olması bizləri çox sevindirir. Biz yaxşı və pis gündə bir-birimizn yanında olduqca, həmrəyliyimiz və birliyimiz daha da möhkəmlənir və sarsılmaz olur. Ümid edirəm ki, 20 iyul azadlıq günündə qardaşlarımızın da ilk gəlişi ilə ŞKTR-in müstəqillik tarixində bir dönüş olacaq”.
