Kəlbəcər istiqamətində Ermənistanın törətdiyi təxribatların arxasında Rusiya dayana bilər - Engin Özər | Eurasia Diary - ednews.net

20 Sentyabr, Bazar ertəsi

Kəlbəcər istiqamətində Ermənistanın törətdiyi təxribatların arxasında Rusiya dayana bilər - Engin Özər

Analitika A- A A+

Ermənistanın son zamanlar Azərbaycanla sərhəddə təxribatlar törətməsinin səbəbi Zəngəzur korridorunun açılmasını əngəlləməkdir. Bu məsələnin arxasında isə birbaşa Rusiya dayana bilər. Bu sözləri EDnews-a iyulun 28-də Ermənistanla sərhədin Kəlbəcər istiqamətdə Erməni hərbi qüvvələrinin Azərbaycan hərbi mövqelərinə qarşı təxribatlar törətməsini şərh edən Türkiyəli politoloq Engin Özer bildirib.

Bildiyimiz kimi, iyulun 28-də səhər saatlarında Azərbaycanın Kəlbəcər istiqamətində yerləşən ordumuzun mövqeləri Ermənistanın Bazarkeçər (Vardenis) rayonundan Erməni hərbi qüvvələri tərəfindən atəşə tutulub. Azərbaycan ordusunun cavab tədbirləri nəticəsində düşmən qüvvələri ciddi itki verərək geri çəkilib.

Rusiyanın təşəbbüsü ilə sərhəddə atəşkəsin təmin olunmasına baxamayaraq, Ermənistan yenə də təxribatlar törətməkdə davam edir.

Məsələyə toxunan Engin Özərin fikrinə görə, Ermənistan rəhbərliyi Azərbaycanla sərhəddə vəziyyəti gərginləşdirməklə Zəngəzur Korridoru layihəsinə mane olmağa çalışır.

“Sərhəddə erməni hərbi birləşmələrinin Azərbaycan hərbi mövqeylərini intensiv şəkildə atəşə tutmasının iki səbəbi ola bilər. Birincisi, Ermənistan bu cür təxribatlarla Zəngəzur Korridorunun qarşısını almağa çalışır. İkinci səbəbə gəldikdə isə Yerevan Azərbaycanla sərhəddə Rusiya sülhməramlı qüvvələrinin yerləşdirilməsi məqsədi güdür,” – deyə Özər bildirib.

“Bir sıra qüvvələr Zəngəzur korridorunun açılmaması üçün Ermənistanın sərhəddə törətdiyi təxribatları dəstəkləyir. Rusiya bu məsələdə başlıca rol oynayır.  Kreml rəhbərliyi həqiqətən Zəngəzur korridoru layihəsinə qarşıdır və bunun həyata keçməməsinə çalışır. Moskva yaxşı anlayır ki, Azərbaycan və Naxçıvan arasında korridorun açılması Türkiyənin Xəzər dənizinə və Mərkəzi Asiyaya yolunu açacaq. Cənubi Qafqaz və Mərkəzi Asiyada Türkiyənin siyasi və iqtisadi cəhətdən möhkəmlənməsi Rusiyanın maraqlarına xidmət etmir. Buna görə də Zəngəzur korridoru məsələsində Rusiya Ermənistana ciddi şəkildə təzyiq göstərmir,” – deyə o əlavə edib.

Engin Özər hər bir ölkədə olduğu kimi, Azərbaycanın da Ermənistanın təxribat xarakterli hücumlarına qarşı ciddi reaksiya vermək haqqı olduğunu bildirib.

“Azərbaycanın öz sərhədlərini qorumaq haqqı var. Ermənistanın təxribatlarına qarşı ciddi şəkildə reaksiya verilməlidir. Ermənistan nə qədər KTMT-ni bu məsələyə qatmaq istəsədə, Azərbaycanın Ermənistanın ərazisinə girmək niyyəti yoxdur”, - deyə ekspert qeyd edib.  

Türkiyəli politoloq açıqlamasında başqa bir önəmli məsələyə də toxunubdur. O hesab edir ki, Ərdoğan hökümətinin irəli sürdüyü Kanal İstanbul layihəsi Rusiyada narahatçılıq doğurur.

“Rusiya rəhbərliyi Türkiyənin ortalığa atdığı Kanal İstanbul layihəsinə ciddi reaksiya nümayiş etdirir. Prezident Rəcəb Tayyib Ərdoğan bu layihənin Montrə müqaviləsinə aid edilməyəcəyini bildirmişdir. Belə olan halda, NATO dəniz qüvvələri, əlbəttə Ankaranın qərarı ilə,  sərbəst şəkildə Qara dənizə girib və çıxmaq imkanı əldə edəcəklər.  Bu da Rusiyanı çox narahat edir. Ona görə də bu məsələdə Moskva Suriya və ya Azərbaycan üzərindən Türkiyəyə təzyiqlər etməyə çalışır. Ermənistanla  sərhəddə baş verən təxribatları bu məsələyə daxil etmək olar”, -deyə Özər qeyd edib.

Sonda politoloq Fransanın regiona daxil olması ilə bağlı yayılan fikirlərə də münasibət bildirib.

“Ermənistan KTMT-nin üzvüdür. Bu təşkilatın nizamnaməsinə görə, üçüncü ölkə KTMT-yə üzv olan ölkələrdə hərbi baza qura bilməz. Ermənistanda Rusiya bazasının mövcud olduğu təqdirdə, Fransa sülhməramlı qüvvələrinin ölkəyə daxil olması qeyri-mümkündür. Əksinə Ermənistanın Azərbaycanla sərhəd ərazilərində yalnız Rusiya sülhməramlı qüvvələrinin yerləşdirilməsi düşünülür”, -deyə ekspert tamamlayıb.

Yunis Abdullayev. 

Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...