Rusiya Xarici İşlər Nazirliyinin mətbuat katibi Mariya Zaxarova ənənəvi brifinq zamanı erməni jurnalistləri diplomatik dillə susdurub. O, “Rusiyanın Azərbaycanın Gorus-Qafan yolunu bağlamasına münasibəti necədir” sualına cavabında bildirib ki, Rusiya Azərbaycanla Ermənistan arasında sərhədin müəyyənləşməsini istəyir və bu məsələdə vasitəçi olmağa hazırdır və Moskva sərhədin delimitiasiyası və demarkasiyası məqsədilə təkliflərini Bakıya və İrəvana göndərib.

Həmçinin, Zaxarova erməni jurnalistin “Rusiyanın Azərbaycanın Türkiyə ilə birgə Laçında təxribatçı təlimlərinə münasibəti necədir” sualına “Rusiya haqqında danışılan təlimlə bağlı mövqeyini Bakının diqqətinə çatdırıb. Azərbaycanlı həmkarlarımızla daima təmasdayıq, ona görə əlavə şərhə ehtiyac duymuram”, - deyə cavablayıb.

Aydındır ki, Rusiya XİN sözçüsü Kremlin siyasətini təmsil edir. Bəs sözügedən məsələlərlə bağlı Rusiyanın siyasəti nədən ibarətdir?

Məsələ ilə bağlı EDNews.net-ə danışan politoloq Əlimusa İbrahimov bildirib ki, Rusiya Xarici İşlər Nazirliyinin mətbuat katibinin erməni jurnalistlərin suallarına verdiyi cavablar bu gün Ermənistan mətbuatında manşetə çıxarılıb və orada mövcud olan siyasi qüvvələr bu cavabları öz mənafeləri baxımından izah və təhlil edirlər: “Paşinyana yaxın qüvvələr Baş nazirin əvvəllər verdiyi bəyanatları xatırladır və komandalarının düzgün istiqamətdə olduğunu qabardırlar. Rusiyanın əleyhinə olan qüvvələr, bu cavabları yenə də Rusiyanın əleyhinə dövriyyəyə buraxırlar”.

Ekspert Mariya Zaxarovanın ondan Azərbaycan əleyhinə söz qoparmağa çalışan erməni jurnalistlərini nə üçün məyus etdiyi sualına cavab olaraq qeyd edib ki, mətbuat katibinin ilk suala cavabı Azərbaycanın mövqeyinin qəbul edilməsi anlamına gələ bilər: “Çünki Zaxarova Azərbaycan tərəfindən postların qoyulması və Ermənistana keçən maşınların yoxlanılması məsələsinin Azərbaycanın öz səlahiyyətlərinə aid olduğunu Rusiyada başa düşdüklərini ifadə etmək istəyir. Postlar məhz delimitasiya və demarkasiya ilə bağlı Rusiyanın Azərbaycana və Ermənistana verdiyi xəritələrə uyğun olaraq müəyyən olunub. Təkcə Rusiya deyil, heç bir dövlət öz ərazisində yaratdığı təhlükəsizlik mexanizmlərinə qarşı çıxa bilməz. Buna sadəcə heç kimin hüququ çatmır. Bu məsələdə Azərbaycandan yalnız xahiş edə bilərlər. Bununla yanaşı, Rusiya delimitasiya və demarkasiya məsələlərinin sürətləndirilməsini gündəmə gətirir”.

Ekspert bildirib ki, Azərbaycanla Türkiyənin Laçında keçirdikləri hərbi təlimlərlə bağlı sualına cavabında da mətbuat katibi diplomatik manevr edərək Azərbaycan və həm də Türkiyənin əleyhinə söz deməkdən çəkinib. Təlimlərlə bağlı Rusiyanın mövqeyinin Bakıya çatdırıldığını deyən mətbuat katibi əlavə edib: “Azərbaycanlı həmkarlarımızla daima təmasdayıq, ona görə əlavə şərhə ehtiyac duymuram”. Diplomatik dildən bu cavabı sadə dilə çevirsək, Zaxarova bu məsələnin Rusiya və Azərbaycan arasında danışılacaq məsələ olduğunu və ermənilərə heç bir aidiyyatı olmadığını demək istədiyi məlum olur”.

Ə. İbrahimov onu da qeyd edib ki, ümumiyyətlə Rusiya Xarici İşlər Nazirliyinin Mətbuat katibi Mariya Zaxarovanın Azərbaycanla münasibətdə olduqca ehtiyatlı davranması Rusiya hakimiyyətinin yüksək pillələrində Azərbaycanla münasibətdə müsbət dəyişikliklərin baş verməsinin anonsu da ola bilər: “Digər tərəfdən, son dövrlər Rusiya sülhməramlı qüvvələrinin Xankəndi və ətraf rayonlarda öz missiyalarına daxil olmayan məsələlərlə məşğul olması və öz işlərini yerinə yetirməmələri haqqında Azərbaycan tərəfinin səsləndirdiyi bəyanatlar öz təsirini göstərib. Rusiyada artıq anlayırlar ki, sülhməramlı missiyanın müddətinin uzadılması məsələsi təkcə Rusiyadan asılı deyil. Burada Azərbaycan həlledici və güclü səsə malikdir. Həmçinin, Rusiyadan ermənilərlə yaxınlaşmaq haqqında bəyanatlar Azərbaycanla Türkiyə arasında münasibətlərin daha da yaxınlaşması ilə nəticələnir. Bu da Rusiya tərəfində heç də arzuolunan deyil”.

“Amma Zaxarova və onun səviyyəsində olan diplomatların Azərbaycanı müdafiə edən bəyanatları belə, bizi sakitləşdirməli deyil. Biz Rusiya ilə münasibətdə ehtiyatı heç zaman əldə verməli deyilik” – deyə ekspert əlavə edib.

Gülnar Səlimova

6.3.4. ictimai və dövlət maraqlarının müdafiəsi