“Millət vəkili Vahid Əhmədovun Laçın dəhlizi ilə bağlı açıqlaması konkret informasiyaya əsaslana bilər”. Bunu EDNews.net-ə politoloq Mətin Məmmədli deputat Vahid Əhmədovun Laçın dəhlizinin tez bir zamanda Azərbaycan tərəfindən nəzarətə götürələcəyi ilə bağlı fikrini şərh edərkən bildirib.
Qeyd edək ki, deputat Vahid Əhmədov Laçın dəhlizi və regiondakı vəziyyət ilə bağlı müsahibəsində bağlı bir sıra önəmli məqamlara toxunub. Əhmədov müsahibəsində Laçın dəhlizinin Azərbaycan tərəfindən nəzarətə götürülməsinin vacibliyini vurğulayıb və bunun tez bir zamanda həyata keçəcəyini bildirib.
“Azərbaycan tezliklə Laçın dəhlizinə nəzarəti tam quracaq”, – deyə Əhmədov bildirib.
Laçın dəhlizinin sərhəd və daxili qoşunları səviyyəsində Azərbaycan hökuməti tərəfindən tam nəzarətə alınması ölkəmizin təhlükəsizliyi üçün olduqca əhəmiyyətlidir. Ona görə ki, bu dəhlizdə baş verən qeyri-qanuni və təhdid yaradan proseslərə yalnız Azərbaycanın özü son qoya bilər. Qeyd etmək lazımdır ki, avqust ayında Ermənistan ordusuna məxsus nəqliyyat vasitələrinin, eləcə də İran yük və yanacaq daşıyan maşınlarının Laçın dəhlizi vasitəsiylə Rusiya sülhməramlı qüvvələrinin nəzarəti altında olun Azərbaycan ərazilərinə daxil olublar.
Rusiya sülhməramlı qüvvələri bu kimi hallara göz yumur və bunun son qoyulmasında maraqlı deyil. Əksinə, sülhməramlı qüvvələr regionda Azərbaycanın maraqlarının pozulmasına şərait yaradır.
Lakin maraqlı məqam burasındadır ki, Laçın dəhlizinin tez bir zamanda Azərbaycan ordusunun nəzarətinə keçəcəyi və bu bölgədə postların qurulması nə dərəcədə real ola bilər? Həqiqətənmi yaxın zamanda Azərbaycan Laçın dəhlizinə tam nəzarət edə biləcək?
Məsələyə toxunan politoloq Mətin Məmmədli Laçın dəhlizinin Azərbaycan, Ermənistan və Rusiya tərəfindən yaradılan üçtərəfli komissiyanın görüşlərində əsas müzakirə mövzularından biri olduğunu ehtimal edib.
“Millət vəkili Vahid Əhmədovun Azərbaycanın tezliklə Laçın dəhlizinə tam nəzarət edəcəyi fikri konkret informasiyaya əsaslana bilər. Ona görə ki, hal-hazırda Azərbaycan Ermənistan və Rusiya rəsmiləri arasında regional kommunikasiyaların açılması ilə bağlı danışıqlar gedir. Bu danışıqlarda müzakirə olunan əsas mövzu predmentlərdən biri Laçın dəhlizinin olduğunu da ehtimal edirəm. Üçtərəfli müzakirələrdə Laçın dəhlizinin ölkəmiz tərəfindən nəzarətə götürülməsini qaldıra bilərik”, - deyə M. Məmmədli qeyd edib.
“Azərbaycan Laçın dəhlizini sərhəd qoşunları və gömrük xidməti vasitəsiylə tam nəzarət altına almalıdır. Hesab edirəm ki, ölkəmizin rəhbərliyi üçtərəfli komissiyanın danışıqlarında bu məsələləri Rusiya və Ermənistanın diqqətinə çatdırıb”, - deyə o əlavə edib.
Politoloq 10 noyabr bəyanatında Laçın dəhlizi ilə bağlı müddəanı da nəzərə çatdırıb.
“Nəzərinizə çatdırmaq istəyirəm ki, Azərbaycan, Ermənistan və Rusiya rəhbərliyi tərəfindən imzalanan 10 noyabr bəyanatında Laçın dəhlizi ilə bağlı maddə qeyd olunub. Maddəyə görə, Laçında üç il ərzində yeni marşrut yolu müəyyən olunacaq və bundan sonra isə quruculuq işləri aparılacaq. Bu müddət bitdikdən sonra isə Laçın dəhlizi daxil olmaqla yeni nəqliyyat yolu Azərbaycanın nəzarətinə keçəcək. Bununla da ölkəmiz Laçına tam nəzarəti bərpa edəcək”.
Yunis Abdullayev