“Gürcüstanın Ermənistan və Türkiyə arasında diplomatik dialoqun qurulmasında vasitəçilik etməsi üçün siyasi dəstəyə ehtiyacı var”. Bu sözləri EDNews.net-ə Cənubi Qafqaz üzrə ekspert Georgi Mçedlişvili bildirib.
Qeyd etmək lazımdır ki, Gürcüstanın Baş naziri İrakli Qaribaşvili Türkiyə Prezidenti Rəcəb Tayyib Ərdoğan ilə görüşündə Ermənistanın Baş naziri Nikol Paşinyanın Ermənistan və Türkiyə arasında diplomatik münasibətlərin qurulması üçün dialoq təklifini ona çatdırıb. Bundan başqa , Gürcüstanın Baş naziri Türkiyə Prezidentinə Gürcüstanın Ankara ilə İrəvan arasında dialoq prosesinin aparılmasında vasitəçilik etməyə hazır olduğunu bildirib.
Bu məsələyə toxunan bəzi ekspertlər Gürcüstanın Ermənistan və Türkiyə arasında diplomatik münasibətlərin qurulmasına aparan dialoq prosesində vasitəçilik etmək potensialı üzərində fikir mübadilələri aparırlar.
Məsələ ilə bağlı danışan gürcü ekspert Georgi Mçedlişvili Gürcüstanın həm Ermənistan, həm də Türkiyə ilə normal münasibətlərinin olduğunu bildirib. Onun qeyd etdiyinə görə, belə olan təqdirdə rəsmi Tiflis iki ölkə arasında dialoqun başlanılmasında başlıca rol oynaya bilər.
“Türkiyə ilə Ermənistan arasında münasibətlərin normallaşması bütün Cənubi Qafqaz və regional dövlətlər üçün faydalı olacaq. Regionda vəziyyətin sabitləşməsindən ən çox Ermənistan qazanc əldə edəcək. Həm Ankara, həm də Yerevan ilə normal münasibətləri olan Tiflis iki ölkə arasında dialoqun qurulmasında başlıca rol oynaya bilər”, - deyə Mçedlişvili bildirib.
"Lakin, bir məqamı da nəzərə almaq lazımdır ki, vasitəçilik etmək üçün təkcə siyasi iradə kifayət etmir. Ermənistan və Türkiyə arasında uzun zaman həll oluna bilinməyən fikir ayrılıqları və problemlər mövcuddur. Belə olan halda Gürcüstanın iki qonşu ölkə arasında danışıqların aparılmasında vasitəçilik etmək üçün siyasi dəstəyə ehtiyacı var. Hesab edirəm ki, Gürcüstanın Ermənistan və Türkiyə yaxınlaşmasında yalnız platforma çərçivəsində iştirak etməsi mümkündür. Bununla bərabər, bu prosesin aparılmasına Gürcüstan yüngül dəstəyini nümayiş etdirə bilər”, - deyə o əlavə edib.
Bir vacib məqamı da qeyd etmək lazımdır ki, Gürcüstan hazırda Qərbin Cənubi Qafqaza girişi üçün əsas açar rolunu oynayır. ABŞ və Avropa İttifaqı Gürcüstanı regionda Qərbin sülh və təhlükəsizlik üzərində əsaslanan dəyərlərinin təbliği üçün əsas amil kimi görür. Buna görə də Qərb liderləri hesab edirlər ki, Gürcüstan Azərbaycan və Ermənistan arasında sülhün və barışığın qurulması, eləcə də Ermənistan və Türkiyə arasında diplomatik münasibətlərin normallaşması proseslərində platforma çərçivəsində vasitəçilik missiyasına malik ola bilər.
Məsələyə münasibət bildirən Mçedlişvili Gürcüstanın qərbyönümlü siyasətinin Tiflisi regional dövlətlər arasında əlaqələrin qurulması və danışıqların aparılması üçün vasitəçilik missiyası imkanı ilə təmin etdiyini bildirib: "İyun ayında Qərbin vasitəçiliyi və Gürcüstanın iştirakı ilə Azərbaycana mina xəritəsinin verilməsi və hərbi əsirlərin mübadiləsi buna sübutdur”.
"Lakin iqtisadi və siyasi zəiflik səbəbindən Gürcüstan vasitəçilik prosesində potensial faktor ola bilməz. Qərb nə qədər regionla bağlı birlik və düzgün strateji siyasət nümayiş etdirsə və regional dövlətlər arasında münaqişələrin və fikir ayrılıqlarının həll olunmasına ciddi şəkildə cəlb olunsa belə, regionda vəziyyət dəyişməz olaraq qalacaq. Bunun başlıca səbəbi Rusiya amilidir. Bu məsələ barədə düşünərkən Moskvanın Cənubi Qafqaz regionunda siyasi təsirini qorumaq üçün uzun müddətli münaqişələrdən öz xeyrinə istifadə etməsini nəzərə almaq lazımdır”, - deyə ekspert tamamlayıb.
Yunis Abdullayev