Mels Ambardanyan,  Rafik Karapetyan,  Zhora Manukyan, Sedrak Soqomonyan, Hovsep Manukyan.

Kimdir bu 5 erməni?

Dövlət Təhlükəsizliyi Xidməti (DTX) tərəfindən 13 dekabr 2020-ci il tarixdə keçirilmiş antiterror əməliyyatı nəticəsində tərksilah edilmiş Ermənistan Respublikasının vətəndaşları.

Nə üçün Azərbaycan sərhədlərini pozmuşdular?

Xocavənd rayonunun Hadrut qəsəbəsinin şimal-qərb hissəsində meşəlik və digər ərazilərində döyüş mövqeləri tutaraq, 13 dekabr 2020-ci il tarixədək olan müddət ərzində ölkə ərazisində yerləşən müəssisə, idarə, təşkilatlara, habelə ayrı-ayrı şəxslərə silahlı basqınlar edib, ictimai təhlükəsizliyi pozmaq, əhali arasında vahimə yaratmaq, Azərbaycan Respublikasının dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və başqa ictimai təhlükəli nəticələrin baş verməsi təhlükəsi yaradan partlayış, yanğın və digər terror əməlləri törətmək.

Azərbaycan məhkəməsi bu terrorçular haqqında hansı hökmü çıxarmışdı?

6 il azadlıqdan məhrumetmə...

Amma dünən onlar azad edildilər. Dünən axşam Bakıdan İrəvana uçan təyyarədə 6 il həbs cəzası almış erməni diversantlarının nə işi vardı? Azərbaycan nə üçün vətəndaşlarına qarşı terror əməliyyatları törətməkdə şübhəli bilinən diversantları Ermənistana qaytardı? Ən əsası Azərbaycan xalqına niyə bu məsələylə bağlı heç bir dövlət qurumu konkret bir açıqlama vermədi?

Əlbəttə, hamı Ermənistanla Azərbaycan arasında yekun sülh sazişinin əldə olunması üçün aparılan danışıqları müsbət qarşılayır, rəsmi İrəvanın Azərbaycanın ərazi bütövlüyünü tanıması, Qarabağdakı qanunsuz hərbi birləşmələrini geri çəkməsi və Zəngəzur dəhlizini Azərbaycanın istismarına verməsi müqabilində 30 illik münaqişəni tarix qəbristanlığında basdırmağı təqdir edir və dəstəkləyir. Həmçinin, heç kim erməni hökumətindən minalanmış ərazilərin xəritələri və ya hansısa ərazilərdən geri çəkilmə müqabilində ölkəmizdəki terrorçuları qaytarılmasına sevinməsə də, ən azından anlayır, başa düşür və ya başa düşməyə çalışır. Lakin bunun üçün insanlara məlumat verilməli, başa salınmalıdır...

Hökumətlərin ən vacib funksiyası xalqın iradəsinə və arzusunu nəzərə alaraq qərarlar qəbul etməsi, addımlar atmasıdır. Buna görə də demokratik prinsiplərə görə, hökumət xalq qarşısında atdığı addımla bağlı hesabat verməlidir. Xüsusən də, erməni diversantlarının təhvil verilməsi kimi incə bir məsələdə.

Xalqa qarşı hesabatlı olmaq xalqla uzlaşmaq, mövcud problemlərin həllində onunla əməkdaşlıq etmək imkanlarını hökumətə qazandırır. Lakin görünür, Azərbaycanda bəzi qurumların rəhbərləri xalqa hesabat verməyə ərinir, sanki bunu özünə yaraşdırmır. Vətən müharibəsi zamanı bəzi məsələlərin açıqlanmaması, hərbi sirr kimi saxlanılması başa düşülən və hətta labüd, məcburi idi. Buna da heç kim etiraz etmirdi. Və sözün həqiqi mənasında Azərbaycandakı siyasi iqtidar xalqa arxalanır və xalqdan dəstək alır. Müharibə dövrü və sonrasında müxalifətçisindən YAP-çısına qədər bir xalq olaraq azərbaycanlıların dövlət başçısına etimad və dəstək göstərməsi bunu əyani sübuta yetirir.

Amma bu gün əli silahlı xalqın üzərinə gələn zaman həbs edilən, Azərbaycan xalqına qarşı terror əməliyyatları törədən və ya törətməkdə şübhəli bilinərək xalqın gözü qarşısında mühakimə edilərək, cəza kəsilən terrorçular xalqa heç bir izahat verilmədən gecənin bir yarısı Ermənistana göndərilir. Biz susuruq, heç bir məlumat vermirik.  Ermənistan Müdafiə naziri tezliklə daha 15-ə yaxın şəxsin geri qayıdacağını söyləyir. Yenə susuruq, heç bir məlumat vermirik.

Doğrudanmı məlumat verməyə məsul olan şəxslər bu addımın nə üçün və hansı məqsədlərlə atıldığını dövlət sirri hesab edirlər? Məlumatları gizlətməklə, insanlar arasında çaşqınlıq, inamsızlıq yaratdıqlarını, müxtəlif söz-söhbətə səbəb olduqlarını anlamırlar? Yoxsa bunu da ölkə başçısı etməlidir?

Xalqın inamı və dəstəyinin davamlı olması üçün hesabatlılıq prinsipinin icrası zəruridir. Dövlət başçısı bu prinsipə tam riayət edir və hər çıxışında, hər bəyanatına Ermənistanla danışıqlardan tutmuş, Rusiya və İranla yaşanan problemlərə qədər hər xırda detalı xalqa açıqlayır və bununla da öz siyasi xəttini xalqa təqdim edir. Bu gün Azərbaycan Respublikasının Müdafiə Nazirliyi, Baş Prokurorluq və Hərbi prokurorluq kimi qurumların da erməni terrorçularının qaytarılması ilə bağlı xalqa dövlət başçısı kimi hesabat verməsi zəruridir.

Dövlət başçısından nümunə götürərək, xalqa doğru gedin...

Nicat İsmayılov