İsrail Rusiyadan izin aldı - Havadan hücumlar başladıla bilər - ednews.net

5 Dekabr,

İsrail Rusiyadan izin aldı - Havadan hücumlar başladıla bilər

Analitika A- A A+

Regionda getdikcə daha da kəskinləşən İsrail və İran münasibətləri məsələyə həm uzaq, həm də yaxın olan Rusiyanı cəlb etməyə başlayıb. Rusiyanın məsələyə uzaq olması əslində onun bir tərəfdən İranla müəyyən nüanslarda müttəfiq cildində çıxış etməsi, digər tərəfdən Rusiyanın İsraillə bir çox məsələdə maraqlarının toqquşmamasıdır. Lakin məhz nüvə proqramı ilə İsraili narahat etməyə başlayan İran bu dəfə Tel-Əvivi Rusiyanın qapısını döyməyə məcbur edib. 

Qeyd edək  ki, İsrail Baş naziri Naftali Bennetin cümə günü Rusiyaya ilk səfəri və prezident Putinlə saatlarla davam edən görüşü məhz elə İranla bağlı olub. Artıq İsrailin Suriyadakı şimal sərhədlərinə qədər yaxınlaşan İran qüvvələrinin ölkəsi üçün açıq bir təhdidə çevrildiyini deyən Bennet görüş zamanı Kreml rəhbərini İrana qarşı birgə tədbir görməyə çağırıb. Bundan əlavə, nazir İranın Suriyadan ayağını kəsməklə onun nüvə proqramına son qoyması üçün birgə mübarizə məsələsini dilə gətirib. 

Qeyd etdiyimiz kimi, Rusiya İranla regionda yaxın müttəfiqlik edən ölkələrdir. İranla Rusiya həm də Suriya, İraq və Liviya daxil olmaqla orta şərqdə yeri gəldikdə Türkiyəyə qarşı birləşən ortaq qüvvələrdir. Məsələnin İsraillə bağlı olduğunu nəzərə alsaq, Rusiyanın İrana nə dərəcədə qarşı çıxa bilməsi və yaxud da, hər iki tərəfin qəlbini qırmadan İsrailin istəyini yerinə yetirə bilməsi prosesin maraqlı tərəfidir. 

İsrailin “Hayom” xəbər saytının redaktoru Şmuel Din Elmas regionda müəyyən işbirliyinə sahib olsalar da, İranın nüvə proqramına sahib olmasından narahat olan, habelə İranın orta şərqdə çox da aktivləşməsini istəməyən Rusiyanın bundan sonra nə kimi addımlar atacağı ilə bağlı EDNews.net-ə açıqlama verib. O, ilk öncə Baş nazir Naftali Bennetin Rusiyaya səfərinə toxunub.     

“Bilirsiniz, Suriyanın müxtəlif ərazilərində hərbi hava qüvvələri daxil olmaqla Rusiyaya məxsus hərbi bazaları mövcuddur. Eyni zamanda, xoşagəlməz hal olsa da, Suriyanın bəzi nöqtələrində İrana məxsus qüvvələr də var. Bu görüşün məqsədi həm də ondan ibarətdir ki, İsrail Suriyada həmin qüvvələrə qarşı hava hücumları etmək üçün ilk öncə Rusiyanın razılığını əldə etsin. 

Həm də bilirsiniz ki, İran qüvvələrinin Suriyada olmasının rəsmi Moskva üçün xoşa gəlməyən tərəfləri də var. Bura həmçinin İrana aid hərbi qüvvələrin İraq və Əfqanıstanda mövcud olması da daxildir”.

İsrailli jurnalist həmçinin İran rəsmisinin İsrailə qarşı bu gün verdiyi hədələyici açıqlamasına münasibət bildirib. 

“Ayətullah rejiminin rəsmisinin İsrailə qarşı verdiyi mənasız bir açıqlama heç bir israilli üçün maraqlı deyil. 1948-ci ildən bəri bir çox ölkələr bizi hədələyib durur və onların aqibətləri də göz qabağındadır. Biz Orta Şərqdə günü-gündən güclənən ölkəyə çevrilirik. Bir də İsrailin Azərbaycan, Misir, BƏƏ və Bəhreyn kimi güclü və ortaq dostları var. Bizim dostlarımız da İranın regionda əfi ilan olduğunu yaxşı başa düşür”. 

Elnur Ənvəroğlu 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...