Qırğızıstan Prezidenti Sadır Japarov illik mətbuat konfransında yerli və xarici jurnalistlərin suallarını cavablayıb. Japarov ölkəsinin Türkiyədən “Bayraktar TB-2” PUA-larını alması ilə bağlı iddiaları təsdiqləyib.

“Qırğızıstan-Tacikistan sərhədində bu ilin aprel ayında baş verən və 36 nəfərin həlak olduğu toqquşmalar zamanı havaya qaldırmağa bir ədəd belə, qırıcımız yox idi. İndi Türkiyə və Rusiyadan hərbi təyyarələr və PUA-lar alacağıq. Qeyd etmək istəyirəm ki, biz hansısa dövlətlə müharibəyə girmək üçün PUA almırıq, biz ölkəmizin təhlükəsizliyini təmin etmək üçün ordumuzu gücləndiririk” – deyə Japarov bildirib.

Lakin Qırğızıstan prezidentinin bu açıqlamalarına baxmayaraq rəsmi Ankaranın “Bayraktar”la bağlı müraciətə müsbət cavab verib-verməyəcəyi sual doğurur. Buna səbəb Qırğızıstanın Kollektiv Təhlükəsizlik Müqaviləsi Təşkilatı üzvü olması və Türkiyə ilə aralarında baş verən “FETÖ” böhranıdır.

Xatırladaq ki, Qırğızıstan hələ də “Fətullah Gülən icması”nın (terror təşkilatı) çox aktiv fəaliyyət göstərdiyi ölkələrdən biridir və bu məsələ dəfələrlə Türkiyə və Qırğızıstan arasında diplomatik problemlərin yaşanmasına səbəb olub.

Beləliklə, “FETO” məsələsi Türkiyə-Qırğızıstan hərbi-siyasi əməkdaşlığına əngəl olacamı? Türkiyə “Bayraktar”ları Qırğızıstana satacaqmı?

türkoloq, türk siyasi ekspert Gencehan Tunay bu sual və Türkiyə-Qırğızıstan münasibətləri barədə EDNews-a eksklüziv açıqlama verib.

“Dövlətlər arasında dostluqlar və düşmənliklər mövcud şəraitə görə dəyişə bilər. Qırğızıstanda FETÖ məktəbləri hələ də mövcuddur. Ölkədəki bir çox insan o məktəblərin məzunudur. Bütün bunlara rəğmən hazırkı prezident Japarov Qırğızıstan vətəndaşı olmağına baxmayaraq “FETÖ”-nun ölkəsindəki baş nümayəndəsini Türkiyəyə təhvil verib. Bundan savayı, son dövrlərdə Japarov hökuməti FETÖ-nun ölkədəki təsirini zəiflədən siyasəti də müşahidə edilir.

Əvvəlki prezident Almazbek Atambayevin hakimiyyətinin son dövrlərdində Türkiyə-Qırğızıstan münasibətləri demək olar ki, bitmişdi. Lakin onun xələfi Sooronbay Jeenbekov bu münasibətləri yenidən bərpa etdi. Hazırkı prezident Japarov isə Türkiyə ilə münasibətləri inkişaf etdirməyin tərəfdarıdır və bu istiqamətdə bir neçə mühüm addımlar atıb. Japarov Ərdoğan ilə milyard dollarlıq müqavilələrə qol çəkib və türk şirkətlərin Qırğızıstana investisiya qoymasına şərait yaradıb. Hazırda iki dövlət arasında iqtisadi, siyasi, hərbi və mədəni əlaqələr inkişaf edir. “FETÖ” artıq Türkiyə-Qırğızıstan münasibətlərini gərginləşdirən bir amil kimi təsir gücünü xeyli itirib. Bütün bunlarla birlikdə Qırğızıstanın FETÖ ilə mübarizəyə də start verməsini nəzərə alsaq hazırda Türkiyənin Qırğızıstana “Bayraktar TB-2” PUA-larını satması qarşısında heç bir siyasi-diplomatik maneənin olmadığını  qeyd edə bilərik”.

Nicat İsmayılov