BƏƏ Şahzadəsi 2012-ci ildən bəri, ilk dəfədir ki, Türkiyəyə səfər edib. Əbu-Dabinin vəliəhdi Şeyx Məhəmməd bin Zayed əl-Nəhyan Ankarada Prezident Recep Tayyip Erdoğanla görüşüb.
Türkiyə mətbuatı bu səfəri “ikitərəfli münasibətlərdə yeni eranın başlanğıcı” elan edib. Xatırladaq ki, iki ölkə arasında münasibətlər Türkiyənin BƏƏ-ni 2016-ci il çevriliş cəhdini dəstəkləməkdə ittiham etməsi də daxil, bir sıra məsələlərlə bağlı gərgin idi. Vəliəhdin təxminən 5 il davam edən gərginlikdən sonra səfəri zamanı BƏƏ və Türkiyə arasında ticarət, energetika, ətraf mühit, nəqliyyat, limanlar, infrastruktur layihələri və investisiyalar sahəsində əməkdaşlığa dair bir sıra sənədlər imzalanıb. Türkiyə iqtisadiyyatına 10 milyard dollar həcmində investisiya etmək üçün BƏƏ İnvestisiya Fondu təsis edilib.
"Biz Türkiyəyə sərmayə qoymaq üçün 10 milyard dollarlıq fond ayırdıq", - BƏƏ-nin Dövlət İnvestisiya Fondu idarə heyətinin rəhbəri Mohammed Hassan Al Suveydi deyib.
Bu xəbərdən sonra son günlər sürətlə ucuzlaşmaqda olan lirə bu gündən etibarən dollar və digər valyutalara nisbətdə möhkəmlənib. Qeyd edək ki, BƏƏ ilə yanaşı, Səudiyyə Ərəbistanı və Qətərin də Türkiyəyə sərmayə qoyacağı haqda məlumatlar gəlməkdədir.
Bəs, Türkiyə iqtisadiyyatına qoyulan sərmayələr türk lirəsinə sabitlik gətirəcəkmi?
Mövzu ilə bağlı Türkiyədə Qafqaz Strateji Araşdırmalar Mərkəzinin (KAFKASSAM) rəhbəri Prof. Dr. Həsən Oktay EDNews.net-ə açıqlama verib.
H. Oktay bildirib ki, dünyada baş verən iqtisadi böhran və pandemiya ölkələrin iqtisadiyyatını ciddi şəkildə təhdid edir: “İstehsal edib ixrac edə bilən, dövlət xərclərini və istehsal xərclərini azalda bilən ölkələr bu böhrandan sağ çıxa biləcəklər. Bu mənada Türkiyə ciddi iqtisadi böhranla üzləşdi. Daxili və xarici siyasətdəki imkanları dəyərləndirərkən, bu iqtisadi böhrandan çıxmaq üçün bir çox addımlar atmalıdır”.
Ekspert qeyd edib ki, xüsusilə xarici sərmayələr Türkiyə iqtisadiyyatı üçün son dərəcə əhəmiyyətlidir: “Son günlər Türkiyədə yaşanan siyasi qarışıqlığın və iqtisadi daralmanın aradan qaldırılması üçün ciddi addımlar atılır. BƏƏ vəliəhd şahzadəsinin Türkiyəyə gəlişi bazarları rahatlatdı. Yüksələn valyuta bazarı ən azı nəzarət altına alındı və bundan sonra gələcək yeni investisiyalar iqtisadiyyatı yüngülləşdirəcək, lakin bu sıxlığı ancaq ixracata yönəltməklə aradan qaldırmaq olar. Xarici investisiyalar, dövlət maliyyəsinə qənaət, istehsal sektorunda xərclərin azalması ixracı artıracaq.
İnvestisiya yönümlü kapital axını təkcə ərəb kapitalından deyil, bütün dünya ölkələrindən təmin edilməlidir. Almaniyanın 1929-cu il dünya iqtisadi böhranından çıxma üsullarını nəzərə alaraq, yeni dünyanın ehtiyaclarına uyğun tədbir görərək, daralan iqtisadiyyatı açmaq üçün üsul axtarışları başlayıb”.
Gülnar Səlimova
Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır
