“Qarabağ erməniləri heç vaxt Azərbaycanın tərkibində yaşamayacaqlar”. Bu sözləri Rusiya sülhməramlı qüvvələrin müvəqqəti nəzarəti altında olan Qarabağdakı qondarma rejimin nümayindəsi David Babayan bildirib.
Qeyd edək ki, özünü “Dağlıq Qarabağ Respublikasının xarici işlər naziri” adlandıran David Babayan mətbuata açıqlamasında Qarabağın heç vaxt Azərbaycanın bir parçası olmayacağını bildirib.
“Nə olursa olsun, heç vaxt Azərbaycanın bir hissəsi olmayacağıq. Bu səbəbdən heç kim bizi belə bir qərara məcbur edə bilməz. Əks halda iki yolumuz var: Ya yeni genişmiqyaslı müharibə etməliyik və qan tökülməlidir. Ya da Qarabağı tərk edəcəyik. Azərbaycanın tərkibində olmağımız qəbuledilməzdir”.
Bu, “xarici işlər nazirinin” ilk belə açıqlaması deyil. Babayan bundan əvvəl də Azərbaycan vətəndaşı olan Qarabağ ermənilərini öz dövlətinə qarşı terrora və müharibəyə çağırıb. Belə olan halda Azərbaycan hüquq-mühafizə orqanları bu şəxsə qarşı ciddi tədbirlər görməlidirir.
Məsələ ilə əlaqədar EDNews.net-ə açıqlama verən Sosial Tədqiqatlar mərkəzinin eksperti Tural İsmayılov hesab edir ki, qondarma rejimin nümayəndəsinin açıqlaması Qarabağdan erməni köçünün qarşısının alınmasına yönəlib.
“Qarabağda separatçı və terrorçu rejimin nümayəndələrinin bu tipli açıqlamalarını dəfələrlə eşitmişik. David Babayanın və onun kimi şəxslərin açıqlamaları yalnız qorxaqlıq təzahürüdür. Ona görə də onlar bu sərsəm və cəfəng bəyanatlarını davam etdirəcəklər”.
“Hamı bilməlidir ki, Qarabağ münaqişəsi deyilən bir münaqişə yoxdur. Azərbaycan bu münaqişəni artıq həll edib. Azərbaycan Respublikasının Prezidenti və Ali Baş Komandan İlham Əliyev bəyanatlarında dəfələrlə bunu təsdiqləyib. “Dağlıq Qarabağ Respublikası” və “Artsax” ifadələri ümumiyyətlə mövcud deyil. Bu ifadələr 30 il ərazində beynəlxalq hüququn pozulması və işğal nəticəsində erməni cəmiyyətində formalaşmış zərərli bir anlayışdır”, - deyə o əlavə edib.
Politoloq David Babayanın açıqlamasını Qarabağdan erməni köçünün qarşısının alınması məqsədi ilə əlaqələndirib: “Qondarma rejimin nümayəndəsinin bu tipli açıqlamaları Rusiya sülhməramlı kontingentinin nəzarəti altında olan Azərbaycan ərazisindən yerli ermənilərin kütləvi köçünün qarşısının alınmasına istiqamətlənib. Hər gün Xankəndində, Ağdərədə və Xocəvənddə yaşayan azsaylı ermənilər yaşadığı yerləri tərk edirlər. Bu isə qondarma rejimi çox narahat edir. Ona görə də onlar belə açıqlamalar ilə özlərinin düşdüyü vəziyyətdən çıxarmağa çalışırlar”.
Politoloq separatçılara qarşı ciddi tədbirlərin görülməsinin vacibliyini vurğulayıb: “Terrorçu və separatçı rejimin rəhbərliyi Arayik Arutyunyan, David Babayan və digər şəxslər barəsində Azərbaycan Respublikasının hüquq-mühafizə orqanları tərəfindən cinayət işi qaldırılıb. Dövlətimizə qarşı cinayət törətmiş separatçılara qarşı tədbirlər daha da gücləndirilməldir. Onu da qeyd edim ki, Rusiya sülhməramlıları da bu şəxsləri məsuliyyətə cəlb etmək öhdəliyi daşıyırlar. Buna görə də sülhməramlılar bu işdə Azərbaycanın hüquq-mühafizə orqanlarına köməklik göstərməlidirlər”.
Yunis Abdullayev
Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır
6.3.4. ictimai və dövlət maraqlarının müdafiəsi;