Rusiya prezidenti Vladimir Putin 2024-cü ildə keçiriləcək prezident seçkilərində iştirakı ilə bağlı hələ qərar vermədiyini bildirib.
"Planlarıma gəlincə, əsas odur ki, Konstitusiyaya uyğun olaraq yeni müddətə seçilmək hüququm var. Bunu edəcəyəm, ya yox, hələ qərar verməmişəm", - deyə Rusiya lideri “Rusiya çağırır!" investisiya forumunda deyib.
Qeyd edək ki, son Konstitusiyaya dəyişikliyi Vladimir Putinə bundan sonra daha 2 dəfə (2024 və 2030-cu illərdə) prezidentliyə namizəd olmaq hüququ verir. Putinin növbəti dəfə prezident seçilmək ehtimalı barədə Rusiya Siyasi və İqtisadi Kommunikasiyalar Agentliyinin aparıcı analitiki Mixail Neyzmakov EDNews.net-ə şərh verib.
"Bildiyiniz kimi, Vladimir Putinin özü bu yaxınlarda qeyd etdi ki, 2024-cü ildə kimin nə planlaşdırdığını söyləmək hələ tezdir. Vladimir Putinin yenidən prezidentliyə namizəd olmaq hüququndan istifadə edib-etməyəcəyi onun qərarından asılıdır. Əgər onun yenidən prezidentliyə namizədliyi irəli sürülsə, onu tənqid edənlər təbii ki, yaş məsələsini gündəmə gətirəcəklər. Lakin V. Putinin əsas elektoratı ənənəvi olaraq onun ən güclü keyfiyyətləri kimi təcrübə və ölkədə sabitliyi qorumaq bacarığının olduğunu düşünür - bu cür gözləntilər yaşlı siyasətçi imici ilə əlaqələndirilə bilər. Maraqlıdır ki, “Levada Mərkəzi”nin 18-24 fevral 2021-ci il tarixli sorğusuna əsasən, hətta Vladimir Putini 2024-cü ildən sonra prezident kimi görmək istəməyən respondentlər arasında belə, yalnız 11% belə bir mövqedən çıxış etməsini onun yaşı ilə bağlayıb ", - M. Neyzmakov deyib.
Politoloq qeyd edib ki, əgər yaxın zamanda prezident seçkiləri keçirilsəydi, Putin ilk turdan əminliklə qalib gələrdi.
"Aydındır ki, iki ildən artıq bir müddət üçün proqnoz vermək çətindir - o zaman siyasi vəziyyətin necə olacağını bilmirik. Ancaq nəzərə almaq lazımdır ki, məsələn, sorğular Rusiyanın hazırkı prezidentinə yüksək səviyyədə dəstək verdiyini qeyd edən yaşlı nəsil nümayəndələri daha fəal seçicilərdir və öz fikirlərini nadir halda dəyişirlər. Vladimir Putinin 2024-cü ilə qədər tərəfdarlarının əsas hissəsinin dəstəyini saxlamaq şansının kifayət qədər yüksək olmasının səbəblərindən biri də budur və eyni zamanda tərəddüdlü seçiciləri öz tərəfinə çəkməsi tamamilə mümkündür. İndiki Rusiya prezidentinin siyasi tərcümeyi-halından 2012-ci ildəki prezidentlik yarışını xatırlamaq olar. O zaman o, çətin şəraitdə və nəzərəçarpacaq küçə etirazları fonunda kampaniyaya başlamaqla seçicilərini mümkün qədər səfərbər edə və dəstək toplaya bilmişdi", - M. Neyzmakov bildirib.
Gülnar Səlimova