Ötən gün (13 yanvar) Vətəndaş və İnkişaf Partiyasının (VİP) sədri Əli Əliyev həbs edilib. Yasamal Rayon Məhkəməsində Hüseyn Səfərovun sədrliyi ilə keçirilən prosesdə Dövlət Sərhəd Xidmətinin polkovnik-leytenantı Emil Cəfərovun Əli Əliyev barəsində xüsusi ittiham qaydasında şikayəti ilə bağlı qərar qəbul olunub. Qərara əsasən, Ə. Əliyev 5 ay müddətinə azadlıqdan məhrum olunub.
Xatırladaq ki, Əli Əliyev “Osmanqızı Tv”-yə verdiyi müsahibəsində 30 noyabrda DSX-ya məxusus helikopterdə olan digər şəxslərin şəhid olaraq nəşinin tanınmaz hala düşdüyü halda, iki nəfərin yüngül sınıqlarla xilas olmasından şübhələndiyini bildirib. Qarşı tərəf isə bu səbəblə partiya sədrini məhkəməyə verib.
Əli Əliyevin həbsi heç də ölkə ictimaiyyəti tərəfindən birmənalı qarşılanmayıb. Mətbuatda və sosial şəbəkələr bu həbs geniş müzakirələrə səbəb olub.
Bəs, ölkədə partiya sədrinin həbs edilməsinə qarşı müxalifət liderləri hansı mövqe sərgiləyir?
EDNews bu məsələ ilə bağlı bir neçə müxalifət partiyasının rəhbərinin fikrini öyrənməyə çalışıb.
“REAL” partiyasının idarə heyətinin üzvü Natiq Cəfərli: - “Əli Əliyevə qarşı həbs çox ağır bir qərardır”.
İlk olaraq, məsələ ilə bağlı Real partiyasının lideri İlqar Məmmədovla əlaqə yaratmağa çalışdıq. Çox təssüflər olsun ki, etdiyimiz cəhdlər boşa çıxdı. Elə bu səbəblə partiyanın digər səlahiyyətli şəxsi Natiq Cəfərliyə müraciət etdik. O, açıqlamasında bildirib ki, siyasətçilər dedikləri sözlərə, ifadə etdikləri fikirlərə görə həbs edilməməlidirlər.
“Siyasətçinin işi danışmaq, fikir yürütməkdir. Buna paralel olaraq onlar da səsləndirdikləri sözlərə qarşı məsuliyyət daşıyırlar. Lakin bu hüquqi yox, mənəvi məsuliyyətdir. Əli Əliyevə qarşı həbs çox ağır bir qərardır. Ümumiyyətlə, yaxşı olar ki, sözə, fikirə görə yox, konkret əməllərə görə həbs qərarları çıxarılsın. Əgər Əli Əliyev hansısa əsaslandırılmamış bir fikir yürüdübsə və ittiham edildiyi kimi böhtan atıbsa ona qarşı həbs yox, nisbətən daha yüngül cəzalar, məsələn, cərimələr tətbiq edilə bilərdi”.
Partiya rəsmisi onu da qeyd edib ki, Əli Əliyevin həbsinin konkret bir siyasi sifariş olub-olmaması ilə bağlı dəqiq faktlar yoxdur.
“Çünki hazırda Azərbaycan siyasətində Ə.Əliyevdən də kəskin, sərt mövqe sərgiləyən siyasətçilər var. Bu kateqroriyadan yanaşsaq Əli Əliyevin həbsi heç də siyasi mövqeyinə görə olmaya bilər”.
“Musavat” partiyasının başqanı Arif Hacılı – “ Bəzi ehtimallara görə Əli Əliyev Rusiyanı tənqid etdiyinə görə həbs edilib”
Musavat partiyasının lideri düşünür ki, Ə.Əliyevinin həbsinin arxasında Rusiyada olan bəzi qüvvələr dayanır.
“Əli Əliyevin həbsi tamamilə qanunsuz, ədalətsizdir. Tənqidi fikirlərinə görə, bəzi ehtimallara görə isə Rusiyanın Azərbaycana qarşı yürütdüyü siyasəti sistemi və ardıcıl şəkildə tənqid etdiyinə görə həbs edilib. Onun guya helikopter qəzasında sağ qalmış zabitlər haqqında dediyi fikirlərə görə həbs edilməsi fikri inandırıcı deyil. Çünki onun dedikləri yalnız mülahizədir. Və mülahizələrə görə insanların həbs olunması Azərbaycan qanunları ilə yolverilməzdir. Ona görə də mən onun həbsini Rusiyadan olan bəzi qüvvələrin sifariş kimi qəbul edirəm və hesab edirəm ki, o dərhal azadlığa buraxılmalıdır” – deyə, A.Hacılı qeyd edib.
“Milli Cəbhə” Partiyasının sədri, millət vəkili Razi Nurullayev: - “Əli Əliyevi həbsə yox, psixiatriya xəstəxanasına göndərmək lazımdır”.
Millət vəkili Razi Nurullayev isə düşünür ki, Əli Əliyevə verilən 5 ay cəza çox azdır.
“Təsəvvür edin ki, Qaraheybətdəki helikopter qəzasında 14 nəfər həlak olub, iki nəfər xilas olub. Bütün xalq yas içindədir. Həlak olanların ailələri ağır və çətin durumdadır. Və bir partiya sədri (Əli Əliyev) çıxıb bəyan edir ki, sağ qalan 2 nəfər dövlətə, orduya və xidmət yoldaşlarına xəyanət edib, 14 nəfəri öldürüb və özləri sağ qalıb”.
Partiya lideri həmçinin qeyd edib ki, Əli Əliyev 14 nəfər zabitimizin həlak olduğu faciə üzərindən iyrənc bir siyasət yürütmək istəyib.
“Bu günə qədər Əli Əliyev mən də daxil olmaqla nə qədər siyasətçiyə böhtanlar atıb, təhqirlər edib. Bir dəfə də olsun həbs ounmayıb. Necə oldu ki, məhz indi həbs olundu? Çünki bu dəfə onun hədəfində siyasətçi, müxalifət, iqtidar yox, iki şərəfli zabit idi. Onlar da haqqlarını tələb edib, onu həbs etdirdilər”.
Lakin...
“Mən bir şeyi də bildirmək istəyirəm ki, əgər bu gün Əli Əliyev hüquqlarının pozulduğu ilə bağlı mənə müraciət etsə, parlamentin İnsan Hüquqları Komitəsinin üzvü kimi onun hüquqlarını müdafiə etməyə hazıram. Çünki mən düşünürəm ki, Əli Əliyevi həbsə yox, psixiatriya xəstəxanasına göndərmək lazımdır. Onun psixoloji müalicəyə ehtiyacı var” – deyə, R.Nurullayev partiya sədrinin həbsinə münasibət bildirib.
“Müasir Müsavat” partiyasının sədri Hafiz Hacıyev: - “Heç bir siyasətçinin həbsinə müsbət yanaşmıram”
“Mən ümumiyyətlə, heç bir siyasətçinin həbsinə müsbət yanaşmıram. Hazırda Əli Əliyevin köməkçiləri ilə əlaqə saxlayıram. Əlimizdən gələn yardımı əsirgəməyəcəyik. Ümid edirəm ki, Əli bəy tezliklə azadlığa çıxacaq” – H.Hacıyev deyib.
Nicat İsmayılov