“İctimai nəzarət bir çox məmurları bu cinayət xarakterli işlərdən çəkindirəcək. Ona görə ictimai nəzarətin hansısa institusional formatı da gərək işlənilsin. Sizin, media nümayəndələrinin bu sahədə çox böyük rolunuz var. Deyə bilərəm ki, mən bəzən xoşagəlməz hallar haqqında sizdən öyrənirəm, sizdən bu xəbəri tuturam və dərhal reaksiya verilir. Deyə bilərəm ki, bir çox hallarda mediada olan məlumatlar təsdiqlənir. Elə məlumatlar var ki, onlar qərəzli xarakter daşıyır. Amma məlumatların mütləq əksəriyyəti təsdiqlənir və dərhal ölçü götürülür. Ona görə dövlət məmurları bilməlidirlər, onların işinə təkcə Prezident Administrasiyası yox, həm ictimaiyyət, həm də media nümayəndələri nəzarət edir”.
Bu fikirləri Azərbaycan Prezidenti İlham Əliyev 12 yanvar tarixində yerli telekanallara verdiyi müsahibə zamanı qeyd edib. Prezidentin fikirlərindən belə anlaşılır ki, o ölkədə azad medianın inkişafını dəstəkləyir və mətbuatın ictimai nəzarət funksiyasından dövlət fayda qazanır anlaşılır.
Bəs, Azərbaycanda mətbuat ictimai nəzarəti təmin edə bilirmi? Medianın bu funksiyanı icra etməsinə hansı amillər mane olur?
Bu suallara media eksperti, məşhur jurnalist Qabil Abbasoğlu ilə cavab axtarmağa çalışdıq. Mütəxəssis EDNews-a açıqlamasında bildirib ki, 2000-ci ilin əvvəllərindən başlayan tendensiya mətbuatın ictimai nəzarət imkanlarını xeyli zəyiflədib.
“Bu tendensiya mətbuatın bəzi qüvvələr tərəfindən bir şəbəkəyə, struktura çevrilməsi cəhdləridir. Lakin mətbuatın öz funksiya və prinsipləri var. Mətbuat bu prinsiplərə qayıtmadığı təqdirdə dövlət başçısının qeyd etdiyi ictimai nəzarət funksiyasını da tam şəkildə həyata keçirə bilməyəcək. Təsəvvür edin ki, bir dövlət məmuru işinin rahat getməsi üçün Prezident haqqında xoş sözlər, təriflər səsləndirməklə özünün fəaliyyətini sığortalayırsa, mətbuat da bu xora qoşulub xorun çoxminli ifaçılarından birinə çevriləcək”.
Ekspert deyir ki, bu cür vəziyyətdə mətbuat cəmiyyət üçün tam yararsız hala düşür.
“Beləliklə, mətbuat Prezidentə, dövlətə və cəmiyyətə heç bir lazımlı informasiya verə bilməyəcək. Min adam ləbbeyk deyirsə, min birinci adamın ləbbeyk deməsi heç nəyi dəyişmir. Çünki öz etdiyi əməlləri ört-basdır etmək istəyən məmurların idarə etdiyi mətbuat azad ola bilmədiyi kimi faydalı da olmayacaq”,- deyə, o, fikirlərini tamamlayıb”.
Nicat İsmayılov