Ermənistan Prezidenti Armen Sarkisyan istefa verməsinin səbəblərini açıqlayarkən bildirib ki, onun ölkənin daxili və xarici siyasətində aparıcı rol oynamağa, proseslərə müdaxilə etmək üçün heç bir imkanı yoxdur.
Lakin bəzi mənbələrə görə, Armen Sarkisyanın istefaya getməsinin pərdəarxasında başqa məqamlar da var. Bir sıra ekspertlər iddia edir ki, Sarkisyan Ermənistanın Azərbaycan və Türkiyə ilə münasibətlərin normallaşmasına tərəfdar olduğu üçün revanşist qüvvələr tərəfindən hədələnib.
Bəziləri isə hesab edir ki, Ermənistan Prezidentinin istefasının arxasında Baş nazir Nikol Paşinyan durur.
Məsələ ilə əlaqədar EDNews-a açıqlama verən politoloq Tofiq Abbasov qeyd edib ki, Armen Sarkisyan və Nikol Paşinyan bir çox məsələlərdə bir-birlərinə müxalif mövqe nümayiş etdiriblər.
“Yadınıza gəlirsə, keçən il Nikol Paşinyan Ermənistan ordusunun Baş Qərargah rəisini vəzifədən uzaqlaşdırmağa çalışarkən, sabiq Prezident Armen Sarkisyan buna qarşı çıxmışdı. Sarkisyan qərargah rəisinin istefaya göndərilməsinə imza atmaq istəmirdi. Hətta, ölkənin iki rəhbəri bir çox məsələlərdə də bir araya gələ bilməyiblər. Bəzi məsələlərdən sonra Sarkisyan başa düşdü ki, onun daxili və xarici siyasətdə heç bir perspektivi yoxdur. O, Ermənistanda gedən heç bir siyasi prosesə təsir edə bilmir. Onun hər bir məsələyə öz mövqeyini bildirməyə imkanı yoxdur. Buna görə də o aradan çıxmağa çalışır”.
Politoloq Armen Sarkisyanın ölkənin daxilinə nisbətən xaricində daha çox imkanlara malik olduğunu bildirib.
“Sarkisyanın Avropa ölkələri ilə sıx əlaqələri var. O, Böyük Britaniyada geniş imkanlara malikdir.Vəzifədən getdikdən sonra onun tezliklə ölkəni tərk etməsi ehtimalı oluna bilər”.
Bəzi ekspertlərdən fərqli olaraq, Tofiq Abbasov Armen Sarkisyanın istefa səbəbinin Azərbaycan və Türkiyə ilə əlaqəli olduğunu hesab etmir.
“Bu gün Sarkisyanın Ermənistanın Azərbaycan və Türkiyə ilə münasibətlərin normallaşmasına müsbət mövqe bildirməsi o demək deyil ki, o, bu məsələdə hansısa bir mövqe nümayiş etdirə bilər. Bu bir növ mahiyyəti olmayan bir arqumentdir. Ona görə ki, yenə də qeyd edirəm Sarkisyanın ölkənin siyasi məsələlərinə təsir etmək imkanları məhduddur. O, özü qeyd etdiyi kimi dövlət quruculuğunda və siyasi proseslərin idarə edilməsində heç bir rolu yoxdur”.
Politoloq Armen Sarkisyanın Qarabağ klanının rəhbərlərindən biri olan Serj Sarkisyanın yaxın adamı olduğunu da vurğulayıb.
“Məhz bu səbəbə görə o, Serj Sarkisyan tərəfindən hakimiyyətə gətirildi. Burada bir məqamı nəzərə almaq lazımdır. Armen Sarkisyan prezident postunu tutduqdan sonra Serj Sarkisyanın ətrafında və ya ona yaxın olan şəxslərə dəstək göstərməyə söz vermişdir. Lakin o, verdiyi sözə əməl edə bilmədi, çünki Paşinyan buna imkan vermədi. Buna görə də Armen Sarkisyan yavaş-yavaş siyasi arenadan uzaqlaşıb rahat həyat yaşamaq istəyir”.
Yunis Abdullayev