Artıq 10 günə yaxındır ki, Rusiya-Ukrayna cəbhəsində qoşunlarının bütün cəbhələr üzrə hücumlarının zəifləməsi və bununla paralel Ukrayna hərbçilərinin daha inamlı müdafiə olunması diqqəti cəlb edir. Rusların bu zəifləməsinin geriləmə ilə müşahidə olunması haqqında məlumatlar var və bu da təbiidir. Müharibənin öz qanunları var. Hücumda deyilsənsə müdafiə olunmalısan və bu zaman da geri çəkilməyə məcbur qalırsan.
İki gün öncə Ukrayna Prezidenti Volodimir Zelenski Kiyev ətrafında 30-dan artıq yaşayış məntəqəsinin ruslardan azad edilməsi haqqında məlumat verib.
Rusların irəliləyə bilməməsinin əsas səbəbi kimi nəqliyyat və daşınma probleminin olması göstərilir. Ruslar irəliləyən ordu hissələrini arxadan yetərincə təmin edə bilmirlər ki, bu da iki səbəbdən mümkündür: Onların buna lazım olan qədər vasitələri yoxdur, Ukrayna ordusu buna imkan vermir.
İstənilən halda ruslar hər keçən gün hücum tempini aşağı salmağa məcbur olurlar.
Rusiyanın hücumunun haradasa dayanması barədə artıq dünyanın bütün kütləvi informasiya vasitələri və müvafiq hərbi analitiklər məlumatlar verir.
İngiltərə Müdafiə Nazirliyinin məlumatına görə Rusiya ötən həftə heç irəliləyə bilməyib və bundan istifadə edən Ukrayna ordusu hətta əks hücuma keçərək ruslara xeyli sayda itkilər verməyə nail olub.
Məlumata görə logistika problemləri indi ruslar üçün çox ciddi narahatlığa çevrilib. Bu səbəblə rusların itkiləri dəfələrlə artıb. Ərzaq, yanacaq və digər zəruri mallarla təmin olunmayan əsgər üçün silahını buraxıb əsir düşməkdən başqa yolun qalmadığı hamıya məlumdur. Elə buna görə də son günlər ukrayna tərəfə keçən rus hərbçilərin və ələ keçən qənimətlərin sayında ciddi artım müşahidə olunur. 140 km-ə yetişən bir məsafədə ordunu təmin etmək Rusiya üçün olduqca çətindir və vəziyyət hər keçən gün ağırlaşmaqda davam edir.
Rusların hücumda geriləməsi daha ciddi problemlər ortaya çıxara bilər. Onlara qarşı maneələr artdıqca ruslar uzaq məsafədən hədəfi dəqiq vuran daha ağır silahlarını- ballistik raketlərini- ortaya çıxarır. Müharibənin başlanğıcında uzaq mənzilli ballistik raketlərdən istifadə hallarına rast gəlirdiksə bu kütləvi deyildi. Hazırda isə Rusiya ordusunun hər gün “İskəndər” raketindən istifadı etdiyi haqda məlumatlar verilir və bu xəbərin intensivliyi hər keçən gün daha da artır. Kreml müəyyən müddət ərzində bu silahlardan və Xəzər dənizində yerləşən hərbi gəmilərindən atdığı raketlərdən istifadə edərək uğur qazana bilər. Amma Ukrayna da qısa zamanda Amerika Birləşmiş Ştatları və NATO üzrə Avropa ölkələrinin silah yardımı sayəsində bu ballistik və hətta qitələrarası silahların qarşısını almaq üçün ciddi havadanmüdafiə sistemləri ilə ( Patriota” qədər) təchiz olunacaq və “İskəndər” lər artıq Rusiyanın istədiyi effekti verməyəcək. Belə olan halda Rusiyanın daha ciddi və son silaha əl atmaqdan başqa çarəsi qalmayacaq. Rusiya Prezidenti Vladimir Putinin də dəfələrlə əl ata biləcəkləri haqda xəbərdarlıq etdiyi son silahın nə olması və onun istifadəyə gətirilməsi halında nələrin baş verəcəyi haqqında düşünmək belə istəmirəm. Vəziyyət həqiqətən çox acınacaqlı və təhlükəli istiqamətdə inkişaf edir.
Əlimusa İbrahimov