“HƏP artıq siyasi mövqeyini dəyişib” – bunu, EDNews-a partiyanın Ali Məclisinin sədri Zəlimxan Məmmədli deyib.
“Haqq Ədalət Partiyasının aydın, açıq bir mövqeyi var. Partiya artıq inkarçı bir mövqe sərgiləmək niyyətində deyil. Çünki hazırkı Azərbaycan iki il əvvəlki Azərbaycandan xeyli fərqlənir. Bilirsiz ki, bizim bundan əvvəl kəskin radikal mövqeyimiz də olub və tənqidi fikirlərimizi açıq şəkildə dilə gətirmişik. İndi isə biz iqtidarla müxalifət arasında qarşılıqlı etimad mühitini formalaşdırmaq niyyətindəyik. Hazırkı şərait bizə partiyanın mövqeyini radikalizmdən, rasionalizmə dəyişməyi diktə edir. Dünyada gedən proseslər, dünya nizamının yenidən formalaşdırılması, Rusiya-Ukrayna müharibəsi və bunun Azərbaycana təsirləri, Qarabağ probleminin həlli bizə bir siyasi partiya olaraq əlavə bir məsuliyyət yükləyir. Bu inkarçılıqdan imtina edib, iqtidarla qarşılıqlı etimad və dialoq şəraitində ölkə problemlərinin həllinə tövhə verməkdir” – deyə Z. Məmmədli bildirib.
Zəlimxan Məmmədli həmçinin bəzi müxalifət partiyalarını tənqid edib:
“Hazırda müxalifət düşərgəsində olanların əksəriyyətini tanıyıram. Onlar inkarçı mövqelərini davam etdirirlər. O rüşvət aldı, bu qanunu pozdu, filankəsinin mülkləri belə gəldi, qısası müxalifətin ritorikası çevir tatı, vur tatıdan ibarətdir. Qardaşlar, ortada Azərbaycan davası var! Azərbaycan davasının qazanılması, yaranmış tarixi şansı doğru dəyərləndirmək üçün daxili resursların səfərbər etmək, təmərküzləşdirmək lazımdır ya yox? Ağıllı adamlar bu suala müsbət cavab verir. Elədirsə ölkə daxilində siyasi uzlaşma təmin edilməlidir. Əgər indiki məqamda biz hökumətlə dialoq qurub siyasi uzlaşma əldə edə biləriksə bundan yalnız Azərbaycan qazanacaq”.
Z.Məmmədli partiya lideri Əli İnsanovun ölkə prezidenti ilə görüşmək arzusunda olduğunu da qeyd edib:
“Bu gün partiyamızın lideri Əli İnsanovun personası yox, tutduğu yol əhəmiyyətlidir. O dünən kim olub, nələri edib, bunlar keçmişin işləridir. Biz bu günə baxıb, sabah üçün çalışmalıyıq. Bəli, bu gün Əli İnsanov 16 il sonra İlham Əliyevlə görüşmək aruzusunu dilə gətirib. Bu milli etimad hökuməti ideyasının icrası üçün atılan addımdır. Biz bu təklifi verib çıxıb getmədik. Biz çalışırıq ki, ölkə daxilində siyasi qüvvələrin cəmləşdiyi bir masa qurulsun. Əli İnsanov da belə bir masada ölkə başçısı ilə əyləşib öz təkliflərini təqdim etmək niyyətindədir. Üstəlik, biz paraleldə hökumətin “radikal müxalifət” adlandırdığı AXCP ilə də bənzər masalarda əyləşmişik. Əli İnsanov İlham Əliyevdən öncə Əli Kərimli ilə görüşüb ölkə taleyi üçün əhəmiyyətli məsələləri müzakirə etmişdi. Qısası, məqsədimiz Azərbaycanda siyasi qüvvələr arasında qarşılıqlı etimadı və dialoqu inkişaf etdirməkdir”.
Novruz bayramı münasibətilə Prezident Administrasiyasından Əli İnsanova ünvanlanan təbriklə bağlı isə Z.Məmmədli bunları deyib.
“Sadəcə Əli müəllimə yox, bir çox partiya liderlərinə sözügedən təbrik məktubu ünvanlanıb. Əli İnsanov da bu jestə normal cavab verib. Bu cavabın xeyli tənqid edilməsi anormaldır. Siyasi mədəniyyət, ictimai əxlaq bizə onu deməyə əsas verir ki, bu təbrikə uyğun da cavab verilməli idi. Yoxsa Əli İnsanov bu təbrikə bir çoxsağolun demiyəcəkdi ki, kimsə onu tənqid edəcək? Qarşılıqlı görüşlər, təbrikləşmə son iki ildə iqtidarla müxalifət arasında müşahidə edilən xoş görüntülərdir. Biz bunun davam etdirilməsinin tərəfdarıyıq”.
Nicat İsmayılov
