Son zamanlar erməni silahlı qüvvələri dövlət sərhədində vəziyyət gərginləşdirməyə çalışır. Bu barədə Azərbaycan Müdafiə Nazirliyinin məlumat yayıb.
Göründüyü kimi erməni revanşistləri sərhəddə yenə təxribat törətməklə bitən Qarabağ münaqişəsini dünya ictimaiyyətinin diqqət mərkəzinə gətirmək istəyir. İddialara görə, bu həm də Ermənistanın daxilində yaranan ixtisaşlardan fikir yayındırmaq məqsədi də güdür.
Hərbi ekspert Ramil Məmmədli hesab edir ki, bu təxribatlar Ermənistan tərəfinin beynəlxalq arenada Qarabağ ermənilərinin hüquqi status məsələsini qaldırmaq məqsədi güdür.
“Ermənistan ordusunun dövlət sərhədində mütəmadi şəkildə təxribat törətməsində iki əsas amil var. Bunlardan biri Ermənistanda hazırki siyasi vəziyyəti, yəni hakimiyyət uğrunda mübarizə, digəri isə bu ölkədə xarici qüvvələrin mövcud olan təsidir. Bu ölkədə Rusiyaya, hətta İrana və Fransaya bağlı siyasi cərəyanlar fəaliyyət göstərirlər. Lakin ən əsası Ermənistanın daxilində baş verən ictimai-siyasi çəkişmələrə diqqət yetirməkdir. İstər daxili, istərsə xarici faktorlar bu çəkişmələrdən istifadə etməklə Paşinyan hakimiyyətinin nüfuzdan salmağa, o cümlədən onun danışıqlarda mövqeyini zəiflətməyə çalışırlar”.
Ekspert həmçinin qeyd edib ki, Kəlbəcər və digər istiqamətlərdə mövqelərimizin atəşə tutulması barədə Ermənistan dövlət qurumları tam xəbərdardılar. Onun sözlərinə görə, ərazilərdə baş verən hər bir hadisə barədə dövlətin rəhbərliyinə məruzə olunur.
"Burada onların məqsədi beynəlxalq təşkilatlara münaqişənin guya hələ həll olunmadığını və bölgədə gərginliyin davam etdiyini bildirməkdir”.
Ramil Məmmədlinin sözlərinə görə, Avropa İttifaqı Şurasının Prezidenti Şarl Mişelin vasitəçiliyi ilə Azərbaycan və Ermənistan rəhbərliyi arasında təşkil olunan görüşdə əldə olunan razılaşmalar fundamental nəticələr deyil.
“Son iki ildə Ermənistan danışıqlardan yayınmağa çalışaraq Qarabağ ermənilərinin status məsələsini təkidlə ortalığa atırlar. Nəzərə alaq ki, Ermənistanın Qarabağda yerləşən silahlı birləşmələri də tam şəkildə tərkisilah olunmayıb. Bütün bu sadaladığım faktlar danışıqların müsbət mərhələsinin olmamasına gətirib çıxarır. Ermənistanın Azərbaycana qarşı ərazi iddialarını davam etdirdiyi təqdirdə sərhədlərin delimitasiya və demarkasiya olunmasında heç bir uğurlu nəticə əldə olunmayacaq”.
Ermənistan ordusunun təxribatlarına qarşı Azərbaycanın cavab tədbirlərinə gəlincə, R.Məmmədli bu ölkə ilə sərhəddə hər hansı hərbi əməliyyatın mümkün olmadığını bildirib.
“44 günlük müharibə dövründə İrəvanın Azərbaycanın dinc yaşayış yerlərinə raket zərbələri endirdiyi halda Azərbaycan eyni hərəkəti Ermənistana qarşı etmədi. Bu baxımdan dövlət sərhədində Ermənistan ordusu ilə ciddi hərbi qarşıdurma gözlənilə bilməz. Yalnız Qarabağ bölgəsində hərbi əməliyyatlar aparıla bilər. Ona görə ki, rus sülhməramlı qüvvələrinin nəzarəti altında olan ərazilərimizdə separatçı rejim və onun silahlı birləşmələri qalmaqdadır. Lakin təxribatlar davam edərsə, Azərbaycan anti-terror əməliyyatlarının keçirilməsi barədə qərar qəbul edə bilər”.
Yunis Abdullayev