Kreml Türkiyənin Suriyanın şimal bölgələrində terrorçu PKK/YPG kürt silahlı birləşmələrinə qarşı keçirdiyi hərbi əməliyyatlardan narahatlıq keçirir.
Belə ki, Rusiya Xarici İşlər Nazirliyinin mətbuat katibi Mariya Zaxarova bildirib ki, Türk ordusunun Suriyada əməliyyatları hüquqi cəhətdən qanunsuzdur. Onun sözlərinə görə, Suriya qanuni hökumətinin razılığı olmadan belə bir addımın atılması Suriyanın suverenliyi və ərazi bütövlüyünün birbaşa pozulması deməkdir.
Məsələ ilə bağlı beynəlxalq münasibətləri üzrə Türkiyəli ekspert İrfan Kaya Ülger Ednews - açıqlamasında Rusiya rəhbərləyinin Türkiyənin Suriyada addımlarından narahatlığını bu sözlərlə ifadə edib.
“2015 - ci ildən bəri Rusiya Suriyada vətəndaş müharibəsində aktiv şəkildə iştirak edərək Əsəd rejiminin arxasında durur və onu möhkəmləndirir. Rusiyanın əsas məqsədinin Yaxın Şərqdə və Şərqi Aralıq dənzində hərbi varlığını gücləndirmək olduğu aydın başa düşülür. İlk növbədə Suriyanın Tartus dəniz limanında Rusiyanın hərbi bazası var idi. Sonra isə ölkənin Huneymim bölgəsində hərbi bazasını açdı. Nəzərə almaq lazımdır ki, Moskva bəzi hallarda YPG kürt silahlı birləşmələri ilə də əməkdaşlıq edib”.
Ekspert, həmçinin ötən həftə Rusiyanın Xarici İşlər Naziri Serqey Lavrovun Türkiyənin təhlükəsizlik tədbirləri görmək hüququna malik olması ilə bağlı açıqlama verdiyini bildirib.
“Hesab edirəm ki, Rusiya Türkiyə ilə Əsəd rejimi arasında barışıq yaratmaq üçün əlindən gələni edir. Amma digər tərəfdən Kreml Suriyada siyasi və hərbi varlığını qorumaq üçün rejimə dəstəyini davam etdirir”. İrfan Kaya Moskvanın Suriyada türk ordusuna qarşı hər hansı təxribatın törətməsinin qeyri-mümkün olduğunu bildirib.
“Rusiya Suriyadakı hərbi qüvvələrinin bir hissəsini çıxardaraq Ukraynaya göndərib. İndiki şəraitdə Tartus və Huneymim bazalarının mövcudluğu daha çox Əsəd rejiminin sağ qalmasından asılıdır. Türkiyəyə qarşı təxribat törədilə bilməz, çünki Türkiyə çox geniş coğrafiyada Rusiyanın hərəkətliliyini məhdudlaşdıran vasitələrə malikdir. Türkiyənin Zaqafqaziya, Orta Asiya, Şimali Qafqaz, Volqa Ural bölgələrinə təsir etmək imkanları var. Moskva bunu yaxşı başa düşür”.
Sonda İrfan Kaya Suriyada terrorçu kürt silahlı qüvvələrinin Rusiya üçün o qədər də əhəmiyyətli ünsürlər olmadığını vurğulayıb.
“Suriyada YPG qüvvələri milli zəmində döyüşdüyünü iddia etsədə, əslində xarici qüvvələr tərəfindən alət kimi istifadə olunur. Müəyyən vaxtlarda YPG-nin gah Rusiya, gah ABŞ gah da İranın yanında olduğunu görürük. Taktiki olaraq bilirik ki, Rusiya siyasi qazanc əldə etmək üçün bu qüvvələri qoruyur”.
Yunis Abdullayev