Qərbin qadağaları ilə üzləşən  Rusiya aviaşirkətləri çıxış yolunu Türkiyədə özlərinə gizli sığınacaq axtarmaqda görür. Belə ki, Rusiya tərəfi hesab edir ki, bu cür çıxış yolu, onlara qoyulan qadağalardan yan keçməyə və aviareysləri rahat şəkildə həyata keçirməyə  imkan verəcək.  

Etibarlı mənbələrin verdiyi məlumata görə, artıq  “Pegas Touristik” və “Anex Tourism Group” şirkətləri Türkiyəyə köçmək imkanını nəzərdən keçirir. Bundan əlavə, aviaşirkətlərin nümayəndələri təyyarələrin lizinqinə dair danışıqlar aparmağa çalışırlar. Ən maraqlı məqam isə budur ki, hazırda “Anex” ilə işləyən “Azur Air” və “Nordwind” şirkətləri  Rusiyada yerləşsə də, türk iş adamları tərəfindən idarə olunur. Artıq Rusiyaya məxsus “Anex” avia şirkəti Antalyaya köçmək qərarını təsdiqləyib. 

Xatırladaq ki, Rusiya Qara dəniz və bir sıra regional məslələrdə Türkiyə ilə birgə əməkdaşlıq, o cümlədən Cənubi Qafqazda mövcud olan problemlərin həllində Ankara ilə hesablaşmaqda yaxından təşəbbüs göstərir. Türkiyəli siyasi ekspert İbrahim Yumşağın sözlərinə görə, rəsmi Kremlin bu cür yanaşması yaxın gələcəkdə Türkiyənin Rusiya üzərində daha güclü nüfuza sahib olacağını göstəricisi ola bilər. O, bu barədə Ednews-a açıqlaması zamanı deyib.

“İlk öncə qeyd etməliyəm ki, Türkiyə son zamanlar çoxşaxəli siyasət yürütməyə başlayıb. Bu səbəbdən Türkiyə həm Qərb, həm də Rusiya ilə balanslı münasibəti qoruyub saxlaya bilir. Əslində Rusiyanı Türkiyəyə yaxınlaşdıran səbəb Rusiyanın Ukrayna ilə müharibədə üzləşdiyi qadağalar olub. Eyni zamanda, Türkiyənin bu qadağalarda bilavasitə Qərblə həmrəy olaraq, iştirak etməməsi onu güvən baxımından Rusiyaya cazibədar göstərməyə başlayıb.

Bir məqamı da əlavə edim ki, Türkiyə Rusiyanın tam sıxışdırılaraq, sıradan çıxarılmasını istəmir. Çünki Rusiya həm də Türkiyəyə Qərblə münasibətləri balanslaşdırmaq üçün köməkçi bir vasitədir”. 

Ekspert həmçinin Türkiyənin balanslı siyasətinin Cənubi Qafqaza da müsbət təsir göstərdiyini də deyib.     

“Əgər Türkiyə Qərb və Rusiya ilə yürütdüyü siyasəti sonadək qoruyub saxlaya bilsə, bu gələcəkdə Qafqaz regionuna da müəyyən töhfələr verə bilər. Çünki Türkiyənin siyasəti Afrika ölkələri, Orta Şərq və həmçinin Qafqaz regionu da daxil olmaqla bütün dövlətlərin ortaq maraqlarını nəzərə alır.”

Professor İbrahim Yumşaq eyni zamanda Ukrayna ilə müharibə aparan Rusiyanın növbədə Qafqaza qarşı törədəcəyi təhlükə və Türkiyənin buna qarşı görə biləcəyi tədbirlə bağlı da fikir bildirib.  

“Türkiyə II Qarabağ müharibəsində Azərbaycana hərtərəfli dəstək olduğu kimi, gələcəkdə də bütün baş verə biləcək təhlükələrə qarşı tədbirlər görməyə  hazırdır. Ukrayna ilə müharibədə Rusiya iqtisadi cəhətdən nə qədər zəiflədilsə də, hərbi cəhətdən öz potensialını qoruyub saxlaya bilib. Hazırda Rusiya eyni anda iki cəbhədə vuruşa biləcək bir gücdədir. Bu səbəbdən də Türkiyə hazırki gedişatı çox yaxından müşahidə edir və izləyir”. 

 İbrahim Yumşaq sürətlə zəifləməkdə olan Rusiya iqtisadiyyatının tezliklə Türkiyəni regionda və dünyada nüfüzlu dövlətə çevirəcəyini deyib. O, həmçinin əlavə edib ki, Rusiya müharibədən sonra da bəzi ağır embarqolara məruz qalacaq. 

“Ukrayna müharibəsi bitsə belə, ABŞ və Avropa bir müddət Rusiyaya tətbiq etdikləri sanksiyaları ləğv etməyəcək. Belə olan halda Rusiya hər iki tərəflə ortaq münasibət saxlayan Türkiyəyə sığınacaq. Bu isə Türkiyənin regionda böyük rəqiblərə qarşı hər mənada nüfuzunun artmasına gətirib çıxaracaq”.

Elnur Ənvəroğlu