Fevral ayının 24-nə kimi Rusiyanın Ukraynaya hücum əmri verilənədək bir çox analitiklər Ukraynada müharibənin baş tutacağına o qədər də ciddi şəkildə inanmırdılar. Lakin Rusiya hücum əmrini çox asanlıqla qəbul edib bölgədə öz planlarını həyata keçirdi.
Basılan nüvə düyməsi...
Son günlər rəsmi Moskvadan Qərbin ünvanına səsləndirilən nüvə silahı adı altında hədələmələr siyasi analitiklər tərəfindən həm ciddi, həm də qeyri-real kimi analiz edilir.
ABŞ-ın Azərbaycandakı keçmiş səfiri, politoloq Metyu Brayzanın fikrincə Rusiyanın nüvə silahından istifadə etməsi onun sonunu gətirə bilər. O, Ednews-a açıqlamasında hətta müharibənin baş verəcəyinin bir ay əvvəldən Ağ Evdə məlum olduğunu deyib.
“Əslində Rusiyanın Ukraynaya işğalçı hücumu əvvəldən məlum idi. Məsələn, prezident Cozef Bayden xüsusi kəşfiyyat məlumatları sayəsində müharibənin bir ay öncədən baş tutacağı barədə məlumat əldə etmişdi. Hətta Rusiyanın tanınmış hərbi analitiki Pavel Felqenhauer iki il əvvəl müşahidələri sayəsində Rusiyanın müharibəyə necə hazırlaşdığı və Ukraynaya hucumu barədə öncədən məlumat vermişdi. Lakin təəccüblü olan budur ki, hamının gözlədiyi halda rus ordusu hücumu təkcə Donbasdan başlatmadı. Şəxsən mən əvvəldən Rusiyanın Ukraynaya hücum edəcəyini və onun əsas hədəf bölgəsinin Luqansk və Donetsk əraziləri olduğunu bilirdim. Lakin daha sonra Rusiyanın iştahı artdı və Mriupol, Odessa və sonda paytaxt Kiyevi işğal etməyə başladı".
Metyu Brazyanın fikrincə, Rusiyanın nüvə silahından istifadə etməsi qeyri-real bir addımdır.
“Rusiyanın nüvə silahından istifadəsinə gəlincə, düşünmürəm ki, bu mümkün deyil. Hətta ABŞ Kəşfiyyat bürosunun rəhbəri Uilliam Börns iki həftə öncə özü belə təsdiqləyib ki, Rusiya tərəfinin nüvə silahından istifadəsi barədə heç bir hazırlıqdan söz gedə bilməz. Bundan əlavə, qeyd etməliyəm ki, Vladimir Putin nüvə silahına əl atacaq qədər ağılsız deyil. Onun məqsədi də bu deyil. Onun əsl istəyi keçmiş post-Sovet məkanı olan Ukrayna ərazilərini yenidən Rusiya torpaqlarına qatmaqdır. Həm də Rusiyanın nüvə silahından istifadə etməsi həm Rusiya, həm də müasir bəşəriyyətin sonu ola bilər. Əgər bu barədə Rusiya mətbuatı söz açırsa, bu həqiqət ola bilməz və bu sadəcə Rusiyanın bir uydurmasıdır. Rusiyanın hərbi hücumunun arxasında dayanan əsas səbəblərdən biri qarşı tərəfi hücum və hədələrə məruz qoymaqla onu təslim olmağa məcbur etməkdir. İkinci məsələ olan Rusiyanın nüvə silahından istifadə etmə iddiası onun öz varlığını dünyada göstərməyə çalışmaq taktikasıdır. Rusiya iqtisadi cəhətdən süquta doğru getdiyindən dünyadakı risk altında olan nüfuzunu nüvə hədələməsi ilə dik tutmağa çalışır”.
Diplomat bu təqdirdə Rusiyanı hansı aqibətin gözlədiyini də dilə gətirib.
“Hətta Kreml nüvə silahından istifadə edəcək qədər dəliliyə əl atarsa, onun Bayden administrasiyasından alacağı cavab adekvat olacaq. Halbuki, nüvə silahı ortada olmadığı təqdirdə Rusiyanı o qədər də böyük təhlükə gözləmir. NATO qüvvələri sadəcə Rusiyanı Ukraynanı işğal etməkdən çəkindirməyə çalışacaq. Bir sözlə, prezident Putin müharibəni durdurmaq qərarını təsdiq etdiyi andan etibarən Rusiyanı heç bir təhlükə gözləyə bilməz.
O ki, qaldı NATO-nun hansı nüvə silahıdan istifadəsinə, bunu harada və necə istifadə etməyi həqbi qüvvələr qərarlaşdıracaq. Təkcə deyə bilərəm ki, bu cavab Rusiyanın sonunu gətirəcək və mən əminəm ki, cənab Putin bunu yaxşı bilir və o bu cür addımı atmayacaq”.
Elnur Ənvəroğlu