Son üç onillik ərzində dünya köklü şəkildə dəyişilib, informasiya vasitələri və onların istehsalı üsullarının inkişafı templəri sürətlənib. Bu gün ölkələr sabit dövlətlər xəritəsində layiqli yer tutmaq, xalqlara sabitlik və əmin-amanlıqla sıx şəkildə bağlı olan rifah və çiçəklənmə təmin etmək, bu sürətli inkişafdan münasib pay almaq, onun templərilə ayaqlaşa bilmək üçün tərəqqi, ölkələrin və xalqların inkişafı naminə zamanla yarışa giriblər.
Azərbaycan keçmiş SSRİ-yə daxil olan respublikalardan biri olub və 1991-ci ildə istiqlaliyyət qazanıb. Azərbaycan kiçik bir dövlət olub, əhalisi 9.5 milyon, sahəsi isə 86.6 min kv. km-dir. Onun da 20%-i Ermənistan tərəfindən işğal edilib və BMT TŞ-nın dörd qətnaməsinə baxmayaraq, bu işğal faktı bu günə kimi davam etməkdədir. Ölkədə 1 milyondan artıq qaçqın vardır, amma onların həyat şəraiti bizim ərəb qaçqınlarınınkı ilə müqayisədə qat-qat yaxşıdır, çünki onlar öz ölkələri daxilindədirlər, hökümət onları hər şeylə təmin edir. Vaxtilə, bir sovet əyaləti və ya quberniyası şəklində olan və dünya ilə birbaşa rabitədən demək olar ki məhrum olan Azərbaycanı nəinki biz, həm də dünyanın bir çox xalqları tanımırdılar. Qısa müddət ərzində bu kiçik ölkə xarici investorlar və turistlər üçün çox cazibədar bir məkana çevrildi. Bu da dövlətin ağır bürokratiya və korrupsiya mirasından xilas olmaq üçün apardığı gərgin mübarizənin bəhrəsi idi. Dövlət özünü beynəlxalq aləmdə tanıtdıra bildi, 2015-ci ildə ilk Avropa oyunlarını uğurla keçirdi. Bu hadisə Azərbaycana tədbiri işıqlandıran dünya KİV-ləri vasitəsilə özünü tam müsair tipli bir ölkə kimi tanıtmaq imkanı verdi.
Azərbaycan həmçinin onun dünyada daha çox tanınmasına yol açan ən müxtəlif tədbirlərə, forumlara, konfranslara, festivallara və s. ev sahibliyi edib. Bu da öz növbəsində ölkəyə turist və investisiya, o cümlədə ərəb investisiyalarının axınının güclənməsinə yardım edib. Son iki ildə Körfəz ölkələrindən və İraqdan gələn turistlərin sayında böyük artım müşahidə olunur. Həm də bu ölkəyə gələnlər oradakı sabitlik, əmin-amanlıq, mükəmməl infrastrukturdan məmnun qalıb. Allah-təalənin bu diyara bəxş etdiyi gözəl təbiətdən, onun göz oxşayan mənzərələrindən həzz alırlar. Neftlə müalicə mərkəzləri bu turistlər arasında böyük şöhrət qazanıb.
İnvestisiya sektoru ərəb və digər xarici investorlar üçün çox cəlbedicidir. Hökümət bir çox iqtisadi sahələrdə xarici investorlar üçün münbit şərait yaradıb. Xüsusilə, ölkədə sabitlik və əmin-amanlığın hökm sürməsi xarici investorlar üçün çox ürəkaçan olub. Azərbaycan neft və qaz ixracatına əsaslanan bir dövlət olsa da, iqtisadiyyat sahələrinin şaxələnməsi, qeyri-neft sektorunun inkişafı sayəsində dünya ölkələrini bürüyən ağır böhrandan yaxa qurtara və iqtisadi inkişaf templərini qoruyub saxlaya bilib.
Azərbaycan müstəqillik qazandığı illərdən bəri, inkişaf və sabitliyin bərqərar edilməsi yolunda iri addımlarla adımlayır. Bütün bunlar ərazisinin beşdə birinin işğalı və işğal olunmuş torpaqların azad edilməsinə yönələn hərbi xərclərin dəfələrlə artırılması fonunda həyata keçirilib.
Ənənəvi olaraq kiçik ölkələrə məhdud imkanlara və qüvvəyə malik dövlətlər kimi baxılır. Lakin tarixi təcrübə bunun tam əksini sübut etdi, bir çox iri dövlətlər öz baxışını dəyişməyə məcbur oldu. Bu kiçik ölkələrin çoxu öz iqtisadi və strateji əhəmiyyəti baxımından bəzi iri dövlətləri də üstələdilər. Biz də bu dövlətlərlə münasibətdə öz mövqeyimizi dəyişməliyik və Misirin mənafeyinə cavab verəcək sahələrdə onlarla əməkdaşlıq etməliyik. Xüsusilə, turizm və investisiya sahələrində geniş əməkdaşlıq imkanları var. Misirlə Azərbaycanı bir-birinə bağlayan tarixi, dini, mədəni əlaqələri ortalıqda olan bir çox problemlərin həllinə yardımçı olub, hər iki ölkə xalqlarının mənafeyinə cavab verən əməkdaşlıq əlaqələrinin qurulmasına imkan verəcək.
Əhməd Əbdo Tərabik
Ərəb dilindən tərcümə: Zakir Qasımov
