Suriyada müxaliflərin nəzarətindəki vilayətə Bəşər Əsəd rejimi hücum etməyə hazırlaşır.
Bölgənin sərhədinə yüzlərlə əsgər göndərilib.
Bəşər Əsədin dəstəkçisi, Qara dənizə 10 müharibə gəmisi göndərən Rusiya İdlibdəki müxalifətçi silahlı qruplaşmalarla danışıqların aparıldığını açıqlayıb.
Türkiyə İdlibdə hərbi əməliyyat keçiriləcəyini bildirib və bu əməliyyatın fəlakətə yol açacağını bəyan edib. Rejim və dəstəkçilərinin İdlibə hücum etməsini istəməyən Qərb ölkələri təhlükə siqnalları çalır və diplomatika yoluna doğru qaçır. Fransa Əsəd rejiminin kimyəvi silahdan istifadə edəcəyi təqdirdə hava hücumlarına başlayacağını elan edib.
Vətəndaş müharibəsinin səkkizinci ilini qeyd edən Suriyadakı düyün Türkiyə sərhədində yerləşən İdlibdə açılacaq. Yarım milyondan çox insanın ölümünə səbəb olan Bəşər Əsəd müxaliflərin əlindəki son şəhər olan İdlibi də ələ keçirmək üçün hərəkətə keçəcək.
Suriya ordusu ilə birlikdə cəbhədə mövqe tutan İran İdlib əməliyyatının yaxında başlayacağını elan edib. 200-dən çox avtobusla bölgəyə daşınan əsgərlərin İdlib sərhədinə doğru istiqamət götürdüyünü bildirən “Tasnim” yarırəsmi xəbər agentliyi konvoyda zirehli tanklar və avtomobillərin də yer aldığını yazıb. Xəbərə görə, ordu birlikləri və İran qüvvələri Həma ilə İdlib arasındadır. Həmadakı hava limanına da hərbi qüvvələr yerləşdirilib, qırıcı və helikopterlər bazada hazır vəziyyətə gətirilib.
2015-ci ilin sentyabr ayından bəri Bəşər Əsədə yardım edən Rusiya isə Aralıq dənizini müharibə gəmiləri ilə doldurub. Rusiyanın “İzvestiya” qəzeti donanmanın 2015-ci ildən bu yana ən böyük gücünü Aralıq dənizinə yolladığını yazıb. Xəbərə görə, donanmada əksəriyyəti “Kalibr” adlı lazerli raketləri daşıyan 10 gəmi və 2 sualtı yer alıb. Çox sayda gəmi də bu gecə donanmaya əlavə ediləcək. Qəzet dəniz qüvvələrinin İdlib əməliyyatına daxil ola biləcəyini qeyd edib.
Rusiya və İranla birlikdə İdlibdə atəşkəs bölgəsi quran Türkiyə isə məsələnin hərbi həllinin fəlakətə yol açacağını bildirib. Xarici işlər naziri Mövlud Çavuşoğlu bəzi radikal qrupları zərərsizləşdirmək üçün İdlibə hücum etməyin yüz minlərlə insanın ölümünə səbəb olmaq və 3,5 milyon insanın evsiz qalması anlamına gəldiyini deyib. “Bu səbəbdən İdlibə hücum etmək yerinə birlikdə nə edə bilərik, təhlükələri necə aradan qaldıra bilərik və buranın sabitliyini necə qoruya bilərik suallarına cavab tapmaq lazımdır”- Çavuşoğlu qeyd edib.
Bundan başqa, ABŞ prezidenti Donald Tramp Almaniya kansleri Angela Merkellə telefonda İdlib prosesini müzakirə edib. Liderlərin telefon danışığını paylaşan almaniyalı sözçü Steffen Seybert Merkellə Trampın durumla bağlı narahatlıqlarını paylaşdıqlarını dilə gətirib.
Aralıq dənizində qüvvə toplayan Rusiya isə ABŞ-ın rejim qüvvələrinə hücum edəcəyini irəli sürür. Rusiyanın Müdafiə Nazirliyi “USS Ross” müharibə gəmisinin 25 avqust tarixində Aralıq dənizinə daxil olduğunu və gəminin 28 “Tomahauk” raketi ilə təchiz edildiyini açıqlayıb.
