“Bizim əsgərlərimizin mənəvi döyüş ruhu yüksək səviyyədədir”.
Eurasia Diary xəbər verir ki, Rusiya mediasının məlumatına görə, bunu erməni jurnalistlərinə Azərbaycanın işğal altındakı Kəlbəcər rayonunun Murovdağ silsiləsində yerləşən qanunsuz işğalçı hərbi hissələrdən birinin komandiri, polkovnik Karen Calavyan söyləyib.
Düşmən komandir erməni hərbçilərinin döyüş ruhunun yüksək olmasının bir əsas səbəbinin də onların “qarşıdakı torpaqların düşmən, Azərbaycan torpaqları deyil, tarixi erməni torpaqları olmasını” bilməsi ilə izah edib.
“Əsgərlərimiz döyüş tapşırıqlarını müvəffəqiyyətlə yerinə yetirməyə hazırdırlar. Əgər düşmən bizə hücum etməyə cəhd göstərərsə, onu dayandıraraq döyüş əməliyyatlarını öz ərazilərimizdə davam etdirəcəyik. Çünki bizdən irəlidə düşmən, yəni Azərbaycan ərazisi deyil, tarixi Şaumyan torpağı və 2 km şimal-qərbdə Gülüstan xarabalıqlarıdır...”
Əldə etdiyimiz əlavə məlumata görə, erməni polkovniki Karen Cavalyanın komandiri olduğu işğalçı hərbi hissə şərti adı “Yeğnikner” olan 38862 nömrəli qanunsuz hərbi hissənin- 10-cu dağ atıcı diviziyasının 7-ci müdafiə rayonuna aid edilir. 10-cu dağ-atıcı diviziyanın qərargahı işğal altındakı Ağdərə şəhərində, 7-ci müdafiə rayonunun qərargahı isə hazırda inzibati cəhətdən Tərtər rayonuna aid edilən keçmiş Ağdərə rayonunun Tonaşen yaşayış məntəqəsində dislokasiya olunur və təmas xəttinin Gülüstan yaşayış məntəqəsi - Murovdağ istiqamətindəki döyüş mövqelərini qoruyur.
P.S. Düşmən komandir “tarixi Şaumyan” torpağı dedikdə təəssüf ki, bəzi orta yaşlı və yaşlı Azərbaycan vətəndaşlarının hələ də eyni cür adlandırdıqları sovet dövründəki keçmiş “Şaumyan kənd rayonu”nu nəzərdə tutur. Gülüstan kəndi də həmin “rayon”a daxil olub. “Rayon”un mərkəzi o dövrdə “Şaumyanovsk”, yaxud “Şaumyan qəsəbəsi” adlanan indi tarixi adı qaytarılmış Ağcakənd kəndi olub. Ərazisi 630 kv.km olan “rayon”un əhalisinin sayı 1970-ci il məlumatına görə 20 minə yaxın olub ki, bunun da 14 mindən çoxu erməni, 4 mində çoxu Azərbaycan türkü olub. 1991-ci ildən “Şaumyan kənd rayonu” ləğv edilərək Goranboy rayonuna qatılıb. 1988-1990-cı illərdə erməni separatçıları bəhs edilən ərazilərə nəzarət etsələr də, 1991-ci ilin aprel-iyul və 1992-ci ilədək keçirilmiş digər döyüş əməliyyatları sayəsində həmin ərazilər Azərbaycan Silahlı Qüvvələri tərəfindən azad edilib.
Xülasə, 30 ilə yaxındır ki, ermənilər sözügedən 630 kv.km-lik ərazini, eləcə də hazırda Göygöl rayonuna daxil edilən Çaykənd və ətraf kəndləri də dünya ictimaiyyətinə və öz gənclərinə “Azərbaycan tərəfindən işğal edilmiş tarixi erməni”, yaxud “Artsax torpağı” kimi təbliğ edir.(moderator.az)