Qarabağın azadlığı uğrunda 27 sentyabrdan etibarən başlayan hərbi əməliyyatlarda döyüşçülərimiz ilə yanaşı hərbi həkimlər də rəşadət göstərirlər.
Nəzərə alsaq ki, savaş zamanı tibbi personala atəş açmaq hüquqa ziddir, lakin Ermənistan tərəfi buna məhəl qoymayaraq hərbi həkimləri və tibbi maşınlarını hədəfə alır.
Eurasia Diary-nin aldığı məlumata görə, ANAMA-nın tapşırığı ilə minalardan təmizləmə əməliyyatları həyata keçirən Beynəlxalq Avrasiya Mətbuat Fondunun (BAMF) İcra Mina Aksiyası Komandasının baş paramediki Azər Şamilov atəşkəs dövründə Ermənistan ordusunun cəbhənin Ağdərə istiqamətində təxribatı zamanı şəhid olub.
Şamilov Azər İlyas oğlu 1971-ci il avqustun 13-də Tərtər rayonunun Qapanlı kəndində anadan olub. 1978-ci ildə Söylən kənd orta məktəbinin 1-ci sinfinə gedib. 1988-ci ildə orta məktəbi bitirib. 1988-90-cı illərdə Sovet ordusunda hərbi xidmət göstərib. 1990-cı ildə könüllü olaraq Milli Orduya yazılıb. 1992-ci ildə Tibb Universitetinə daxil olub. 1998-ci ildə universiteti bitirib. O, 1998-ci ildən Naxçıvanda leytenant rütbəsində hərbi həkim kimi xidmət edib. 1999-cu ildə Söylən kəndində baş həkim işləyib.
Ş. Azər 2004-cü ildən BAMF-ın İcra Mina Aksiyası Komandasında fəaliyyətə başlayıb. Uzun müddət ərazilərin minalardan təmizlənməsi əməliyyatlarında baş paramedik kimi şərəflə xidmət göstərib. 2020-ci il sentyabrın 21-də ehtiyatda olan hərbi həkim kimi orduya çağırılıb. Tərtər rayonunun Suqovuşan və Talış kəndləri istiqamətində gedən döyüşlərdə iştirak edib. Oktyabrın 14-də Suqovuşanda tibb maşınının atəşə tutulması nəticəsində həlak olub.
Azər Şamilovun iki övladı yadigar qaldı. Oğlu Şamilov Fədayət və Şamilova Aynur Azər qızı orta məktəbdə təhsil alırlar. Həyat yoldaşı Kələntərli kəndində müəllimə kimi çalışır.
Allah rəhmət eləsin! Ailəsinə və övladlarına ANAMA kollektivi və BAMF adından dərin hüznlə başsağlığı veririk.