Düşmən tapdağından azad edilən torpaqlarda ermənilərin qurduğu mina adlanan tələ bu ərazilərə hələ ki, rahat şəkildə ayaq basmağımıza imkan vermir. Azərbaycan Ordusuna məğlub olduğunu görən ermənilər mina döşəyən maşınlarla buranı əsl təhlükə yuvasına çeviriblər.
Azərbaycan tərəfi öz növbəsində vətəndaşlarına bu ərazilərə daxil olmamağı tövsiyə edib və icazəsiz səfərlər qanunsuz sayılır. Lakin dəfələrlə edilən rəsmi xəbərdarlıqlara baxmayaraq, təhlükəli ərazilərə səfər edən və xəbərdarlıq nişanlarına məhəl qoymayan vətəndaşlarımız hələ də var. Nəticədə müharibə başa çatsa da, bu və digər səbəbdən son günlərə kimi itkilərlə üzləşirik. Anlayırıq ki, 30 ildir davam edən yurd həsrəti öz elindən didərgin düşmüş 1 milyona yaxın məcburi köçkün əhalimizin bir çox nümayəndəsində bu yerlərə ən qısa vaxtda səfər etmək istəyi yaradıb. Ancaq həyat hamıya bir dəfə verilir və istənilən məsuliyyətsiz addım baha başa gələ bilər.
Müharibə bitdikdən dərhal sonra dövlət tərəfindən ərazilərin minalardan təmizlənməsi istiqamətində lazımi tədbirlər görülməyə başladı. Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) tərəfindən keçirilən təcili təxirəsalınmaz əməliyyatlar nəticəsində hər gün hektarlarla ərazi minalardan və sursatlardan təmizlənib. Yanvarın 15-də isə Prezident İlham Əliyevin fərmanına əsasən “Azərbaycan Respublikasının Minatəmizləmə Agentliyi yaradıldı.
Bəs müharibə zamanı minalanmanın qaydaları ilə bağlı hansısa hüquqi tənzimləmə mövcuddurmu?
“Müharibə aparan hər bir dövlətdə və əsasən də müdafiədə duranlarda mina sayının xəritəsi olur”. Bunu hərbi ekspert, ehtiyatda olan general-leytenant Yaşar Aydəmirov Eurasia Diary-yə açıqlamasına deyib.
Onun sözlərinə görə, hansı ərazilər minalanırsa minalanmanın sxemlərinə uyğun xəritədə qeydlər aparılır və onlar da məxfi hərbi hissələrdə saxlanılır: “Bütün şəxsi heyət haradasa bir fəaliyyət göstərəndə mina axtaranlar girib müdaxilə etməsə ora heç kim buraxılmır. Çünki piyadalar onların yerlərin bilmir”.
Y. Aydəmirov qeyd edib ki, etnik münaqişələrdə partladıcı maddələrdən daha çox istifadə edilir. O bildirib ki, minalardan istifadə edilməsinin qadağan olunması barədə konvensiya var, lakin Ermənistan bu Konvensiyaya qoşulmayıb.
“Əgər Ermənistan tərəfi bəyannaməyə qol çəkibsə... Mən inanmıram ki, erməni hərbi hissəsinin qalıqları, hansısa zabit anbarlarda olan, yaxud ərazilərdə basdırılan minaları özləri ilə götürüb Ermənistana aparsın. Sözsüz ki, onlar Kəlbəcər, Laçın, Fizuli və digər rayonlar istiqamətində döyüşlər gedəndə bu ərazilərə kütləvi şəkildə minalar basdırıblar. Kəlbəcərdən çıxanda orada meşə yamaclarında, dərələrdə, yollarda həm tank, həm də piyada əleyhinə minalar basdırılıb", o deyib.