Ukraynada artan gərginliklə bağlı Avropa İttifaqı ölkələri, ABŞ-ın çətiri altında hərtərəfli şəkildə səfərbər olmağa başlayıb. Bunlardan bəziləri bir qədər neytral, bəziləri isə daha sərt mövqe sərgiləyək Rusiyaya qarşı ABŞ-ın yanında yer alıb.    

Məsələn, bir müddət əvvəl Aİ-nin aparıcı dövlətlərindən olan Almaniya admiral Kay Akim Şönbaxın Rusiya mövqeyindən çıxışı ilə bütün nəzərləri üzərinə yönəldib. Bu rəsmi Kiyevi tam məyus etməsə də, Almaniya hökumətinə qarşı etibarının qismən sarsılmasına gətirib çıxarıb. 

Fransa prezidenti Emmanuel Makron isə məsələ ilə bağlı gərginliyin azaldılmasının yalnız Rusiya prezidenti Vladimir Putinlə danışıqlarla mümkün olduğunu bildirib. Makronun sərgilədiyi yanaşma neytral görünsə də, bu addım rəsmi Kremillə dil tapa bilməyən ABŞ-ı təəccübləndirib. Hətta bu ABŞ-da Makron və Putin arasında gizli münasibətlərin olması kimi bir şübhə də formalaşdırıb.  

Proseslərin bu formada davam etməsi və Qərb tərəfdarlarının fərqli mövqedən yanaşma tərzi isə bəzi, aydın olmayan suallar yaradıb.

EDNews məsələ ilə bağlı politoloq Samir Hümbətov ilə son proseslər barədə müzakirə aparıb. Siyasi analitikin fikrincə, NATO özü bir qurum olaraq, indiyə qədər tam formalaşmayıb. 

 “Aİ dövlətlərinin mövqelərinə gəlincə isə bu fərdi yanaşma ilə bağlıdır. Məsələn, deyərdim ki, ABŞ-ın bu xüsusda şübhələri heç də yanlış deyil. Çünki Fransa ilə Rusiya arasında gizlin isti münasibətlər var. Almaniyanın davranışı isə onun Rusiya ilə ticarət əlaqələri ilə bağlıdır. Digər Avropa ölkələrinin neytrallığı isə Rusiya ilə Ukrayna arasında olan milli yaxınlıqla bağlıdır. Bəzi Avropa ölkələri hesab edir ki, Ukrayna və Rusiya hər ikisi slavyan xalqı olduğu üçün nə zamansa onlar barışa bilər. Bu səbəbdən də o dövlətlər arada pis olmamaq üçün bu münaqişənin bir parçası olmamağa çalışırlar”.

S.Hümbətov həmçinin müharibə olacağı təqdirdə Aİ-nin Rusiyaya qarşı səfərbər olub-olmayacağı barədə də bəzi məqamlara toxunub.  

“Aİ dövlətlərinin birlikdə səfərbər olub Rusiya üzərinə hücuma keçməkləri demək olar ki, mümkün versiya kimi görünmür. Düzdür, ittifaq daxilində öhdəliyə görə hər bir ölkə buna dəstək olmalıdr, lakin bu hərbi formada deyil ayrı bir şəkildə baş tuta bilər. Nəzərə alınmalıdır ki, Avropa dövlətləri hər biri öz maraqları çərçivəsində davranır. Fransa da bu qrupa aiddir və xüsusilə də AUKUS paktından sonra Fransa ilə ABŞ arasında soyuqlaşan münasibətlər onu bir qədər Rusiyaya meyilləndirib”.  

Elnur Ənvəroğlu