"Deyirlər ki, siz başqa planetdən insanlara qeyri-mümkünə inanmağı öyrətmək üçün gəlmisiniz. Planetlərimiz bir-birinin yanındadır, çünki mən sağ qalmağın demək olar ki, qeyri-mümkün olduğu yerdə yaşayıram".

Ednews xəbər verir ki, bu sözləri Ukraynanın Mariupol şəhərində Rusiya qüvvələri tərəfindən mühasirəyə alınan polad zavodunda gizlənən əsgərlərdən biri onların təxliyəsinə kömək etmək üçün “SpaceX” və “Tesla” şirkətlərinin rəhbəri, milyarder İlon Maska müraciətində qeyd edib.

"Azovstaldan vasitəçi ölkəyə getməyimizə kömək edin. Siz etməsəniz, kim edəcək? Mənə bir işarə verin", -deyə dəniz komandiri Serqiy Volina “Twitter”də yazıb.

Məlumata görə, ötən həftə Azovstal zavodundan bir çox mülki şəxs Rusiya ilə razılaşma əsasında xilas edilsə də, həftələrlə davam edən bombardmanlardan sonra bəzisi yaralı olan yüzlərlə döyüşçünün çıxarılmasına dair Moskva ilə razılaşma əldə olunmayıb.

Qeyd edək ki, fevral ayında Mask ondan kömək istəyən Ukrayna hökumət rəsmisinin müraciətinə cavab vermişdi. Mask, “SpaceX”in Starlink peyk genişzolaqlı xidmətinin Ukraynada aktivləşdirildiyini və şirkətin ölkəyə daha çox terminal göndərdiyini bildirib.