Həm Qarabağ, həm də Ukrayna ilə müharibədə Bayraktar TB2-nin gücündən təsirlənən Rusiya qonşu İrana üz tutub. ABŞ Dövlət Departamentinin mətbuatla əlaqədar şöbəsindən verilən məlumatda deyilir ki, Rusiya İranda dronlarla bağlı həm də təlimlərdə iştirak edib.
Azərbaycanlı hərbi ekspert, Xəzər Müdafiə Tədqiqatları Mərkəzinin rəhbəri Ramil Məmmədli bu barədə Ednews-a açıqlama verib. Onun sözlərinə görə, Rusiyanın İrana məxsus dronların alınması ilə bağlı rəsmi Tehranla apardığı danışıqlar bir müddətdir ki davam etməkdədir.
“Görünür əldə olunan razılıqdan sonra artıq Rusiya ordusu İran dronlarının istifadəsi ilə bağlı təlimlərdə iştirak edir”.
Ekspertin sözlərinə görə İran dron istehsalı sahəsində son illər ərzində bir neçə uğurlu layihələrə imza atıb.
“Qeyd edim ki, İranın istehsal etdiyi dronlar həm də silahlı pilotsuz uçuş aparatı hesab edilir. Rusiyanın bu dronları almaqda marağı şübhəsiz ki, Ukrayna cəbhəsi ilə döyüşdə ona qarşı istifadə etməkdir”.
Ramil Məmmədlinin sözlərinə görə Rusiya “Şahid-191” və “Şahid-219” adlandırılan İran dronlarını həm də Türkiyənin Bayraktar-TB2 dronlarına qarşı bir növ alternativ kimi istifadə etmək niyyətindədir. Ekspert müqayisə apararaq deyib ki, hər iki PUA özündə silah daşıma funksiyasına malikdir və müharibədə düşmən hədəflərinə ağır itkilər verə bilər.
“Müharibə zamanı Ukrayna ordusu Bayraktarlarla rus ordusuna xeyli zərbə vurdu. Rusiya buna cavab olaraq, İrandan aldıqları dronlarla Ukraynanın dərinlikdə yerləşən müdafiə xəttini, silah-sursat anbarları və digər texnikalarını məhv etmək istəyir”.
İrana məxsus dronların texniki özəlliyindən söz açan hərbi ekspert, həmçinin bu növ uçuş aparatının müharibədə dönüş yarada biləcəyini deyib.
“Ümumiyyətlə, hər iki cəbhədə bu cür yeni uçuş aparatlarından istifadə etmək müharibənin yeni mərhələlərinin meydana gəlməsinə səbəb olacaq. Əgər fikir versək görə bilərik ki, həm Rusiya, həm də Ukrayna döyüşlərdə ən son silahların istifadəsinə üstünlük verir”.
Elnur Ənvəroğlu