Hazırda Ermənistan Azərbaycanın işğal altında olan ərazilərində qeyri-qanuni məskunlaşdırma siyasəti aparılır. Azərbaycan tərəfinin rəsmi icazəsi olmadan Qarabağdakı ərazilərimizə qanunsuz səfər edən erməni əsilli rusiyalı milyarder Ruben Vardanyan sentyabrən 1-də öz telegram-kanalında yayımladığı və Xocavənddəki 2 mindən çox yaşı olduğu deyilən nəhəng çinarın fonunda olan video-müraciətdə Rusiya vətəndaşlığından imtina edərək, Qarabağdakı hayklara köməyə gəldiyini bildirib. O, Qarabağda, yəni Rusiya sülhməramlılarının nəzarəti altında olan Azərbaycan ərazilərində "Artsax təhlükəsizlik və inkişaf fondu"nu yaratdığını əlavə edərək bütün dünya haylarını “Artsax xalqı”na köməyə çağırıb.
Bütün bunlar azmış kimi xam xəyallarından danışan “qəhraman” dünən - sentyabrın 5-də dünyaca məşhur "Forbes” biznes jurnalına müsahibə də verib.
Hər zaman yalanlar üzərinə qurduqları “dünyalarında” yaşayan və məkrli planlarlndan əl çəkməyən soyköklərindən bixəbərlərin “ağıllı” nümayəndəsi zəfərlə taclandırılan və ədalətin bərqərar olduğu 44 günlük Vətən Müharibəsini çox tez unudaraq hətta Qarabağdakı "planları və vəzifələri haqqında" bəzi məqamları açıqlamağa da cürət edib.
"Elə bir vəziyyət yarana bilər ki, mən məcbur olub dövlət vəzifəsini qəbul etməyi düzgün hesab edim. Ermənistanda qanun dövlət qulluqçularının ikili vətəndaşlığı və xaricdə əmlak sahibi olmasını qadağan edir. Bundan əlavə, dövlət vəzifəsini tutmaq üçün ölkədə bir müddət yaşamalı və bu müddət ərzində başqa vətəndaşlığınız olmamalıdır",- deyə Vardanyan müsahibəsində bildirib.
"Qarabağda dövlət vəzifəsini tutmağı planlaşdırırsınızmı?" sualını isə R. Vardanyan belə cavablandırıb:
"Xeyr. Mən mənəvi baxımdan da daxil olmaqla, tam fəaliyyət azadlığına malik olmaq istəyirəm. Bütün hallarda Qarabağ hələ də tam hüquqlu müəyyən statusa malik olmayan bir ərazidir və bu münaqişə hekayəsində mən Rusiyanı təmsil etmək istəmirəm.
“Artsax”da əsas vəzifəniz kimi nələri görürsünüz?
- Qarabağda ölkənin və regionun təhlükəsizliyini gücləndirəcək güclü iqtisadiyyata və sosial institutlara malik uğurlu cəmiyyətin qurulması üçün şəraitin yaradılması. Bu mənada mənim əsas funksiyam öz təcrübəmdən (həm idarəçilik, həm də maliyyə) və əlaqələrimdən, o cümlədən danışıqlar aparmağı bilən bir insan kimi imkanlarımdan istifadə etməkdir ki, son dərəcə çətin vəziyyət şəraitində və dərin uzunmüddətli münaqişə nəticəsində min illərdir ermənilər Qarabağda yaşadığı torpaqlarını saxlamaq üçün hər şey edib. Eyni zamanda, ksenofobiya və qarşılıqlı nifrətə deyil, bir-birinin yanında yaşamağı öyrənmək istəyinə arxalanaraq, qonşularla münasibətlər qurmağın çətin yoluna başlamağa çalışacam. Mən həmişə birləşməsi mümkün olmayan şeyləri birləşdirən insan olmuşam. Müharibədə iştirak etməmişəm, döyüşməmişəm, bu mənada mənimlə ünsiyyət Qarabağda müharibə keçmiş insanlarla əlaqədən daha asan ola bilər",- deyə erməni milyarder bildirib.
Onu da qeyd edək ki, R. Vardanyan həm də "Troyka Dialoq" investisiya şirkətinin keçmiş sahibi olub. Moskvada yerləşən Skolkovo İdarəetmə Məktəbinin təsisçilərindən biridir. Yeri gəlmişkən, 2006-cı ildə bu qurumun açılış mərasimində V.Putin də iştirak edib.
Hələlik rəsmi Bakı Rusiya və Ermənistan vətəndaşı olan erməni milyarderin Azərbaycan ərazilərinə qanunsuz səfəri və oradakı təxribatçı planlarını da bəyan etməsinə heç bir münasibət bildirməyib.
Elsevər Məmmədov
Araşdırmaçı jurnalist