Azərbaycan Prezidentinin köməkçisi Hikmət Hacıyev 2020-ci il noyabrın 10-dan bu günədək mina partlayışları nəticəsində 427 nəfərin zərər çəkdiyini bildirib.
EDnews xəbər verir ki, bunu Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev “X” sosial media hesabında yazıb.
Hikmət Hacıyev bildirib ki, minalar Ermənistan-Azərbaycan münaqişəsinin ən ağır miraslarından biri olaraq qalır.
Onun sözlərinə görə, aktiv hərbi əməliyyatların başa çatmasından uzun müddət keçməsinə baxmayaraq, minalar insan həyatı üçün ciddi təhlükə yaratmaqda davam edir.
Prezidentin köməkçisi qeyd edib ki, 2020-ci il noyabrın 10-dan etibarən Azərbaycanda mina partlayışları nəticəsində 427 nəfər zərərçəkən qeydə alınıb.
Onlardan 73 nəfər həlak olub, 354 nəfər isə müxtəlif dərəcəli bədən xəsarətləri alıb.
Hacıyev əlavə edib ki, zərərçəkənlərin 231 nəfəri mülki şəxsdir.
Onun sözlərinə görə, 1991-ci ildən bu günədək mina qurbanlarının ümumi sayı 3 500 nəfəri ötüb. Onların arasında 362 uşaq və gənc, eləcə də 38 qadın var.
Prezidentin köməkçisi vurğulayıb ki, minaların yaratdığı faciəvi insan itkisi ilə yanaşı, genişmiqyaslı mina çirklənməsi məcburi köçkün ailələrinin öz doğma yurdlarına təhlükəsiz qayıdışına ciddi maneə törədir.
O bildirib ki, mina təhlükəsi azad edilmiş ərazilərin bərpasına, iqtisadi inkişafına və kənd təsərrüfatının dirçəldilməsinə də mənfi təsir göstərir.
“Aşkar edilərək zərərsizləşdirilən hər bir mina təkcə potensial olaraq xilas edilmiş bir insan həyatı deyil, həm də bərpa və yenidənqurma yolunda atılmış mühüm addımdır. Minatəmizləmə fəaliyyəti yalnız təhlükəsizlik məsələsi deyil, həm də humanitar zərurət və dayanıqlı bərpa ilə inkişafın əsas şərtlərindən biridir”, – deyə Hikmət Hacıyev qeyd edib.
.jpg)
.jpg)
