Bu il itirdiyimiz ilk məşhur Şirvan aşıq məktəbinin məşhur ustadlarından Aşıq Mahmud Ələsgəroğlunun ilk övladı Aşıq Vüqar Mahmudoğlu oldu. Yanvarın 8-i infarkt keçirən V.Mahmudoğlu ürəyindən əməliyyat olunsa da, iki gün sonra vəfat etdi.

Uzun müddət ürək xəstəliyindən əziyyət çəkən xalq artisti Zərnigar Ağakişiyeva fevralın 6-da 72 yaşında dünyasını dəyişdi.

Azərbaycanın tanınmış bəstəkarı, əməkdar incəsənət xadimi Tahir Əkbər 2018-ci il martın 2-də vəfat etdi.

Bu il itirdiyimiz tanınmışlardan biri də millət vəkili Astan Şahverdiyev oldu. O, aprelin 15-də qəfil ürək tutmasından vəfat etdi.

Azərbaycan ictimaiyyəti üçün ilin ən böyük itkilərindən biri də Xalq artisti Fuad Poladovun vəfatı oldu. Uzun müddət xərçəng xəstəliyindən əziyyət çəkən görkəmli aktyor mayın 4-də aramızdan ayrıldı.

Xalq artisti, “Şöhrət” və “Şərəf” ordenli bəstəkar Xəyyam Mirzəzadə iyulun 30-da 82 yaşında uzun sürən xəstəlikdən sonra vəfat etdi.

Əməkdar artist və əməkdar mədəniyyət işçisi Həsənağa Sadıqov avqustun 1-də xərçəng xəstəliyindən dünyasını dəyişdi.

Ölümü ən çox müzakirə olunan məşhurlardan biri də Anar Nağılbaz oldu. Son vaxtlarda şəxsi həyatı ilə gündəmə gələn tanınmış reper avqustun 4-də daxili qanaxmadan vəfat etdi.

Xalq artisti Amaliya Pənahova noyabrın 8-də bu dünya ilə vidalaşdı.

Tanınmış sənətçi, “Savalan” qrupunun bədii rəhbəri Novruz Novruzlu noyabrın 20-də, klarnet ifaçısı Zahid Sabirabadlı isə dekabrın 18-də dünyasını dəyişdi.

Bu il dünyasını dəyişən məşhurlar sırasında xalq artisti, Rus Dram Teatrının aktyoru Yuri Baliyev, xalq artisti Gülcahan Güləhmədova, xalq artisti, kamança ustası Kamil Vəzirov, xalq artisti, tanınmış rəqqas Böyükağa Məmmədov, Xalq rəssamı, heykəltaraş Tokay Məmmədov, bəstəkar, əməkdar incəsənət xadimi Həsənağa Adıgözəlzadə, istiqlalçı deputat Məryəm Həsənova da vardı.