Çin Xalq Respublikasının (ÇXR) paytaxtı Pekində Azərbaycan klassik musiqisindən ibarət konsert keçirilib. Konsert Azərbaycan-Çin dostluğuna həsr olunub.

Eurasia Diary xəbər verir ki, tədbir Heydər Əliyev Fondu və Xarici Ölkələrlə Dostluq üzrə Çin Xalq Assosiasiyası tərəfindən təşkil olunub.

Tədbirdə ÇXR-in yüksək səviyyəli rəsmiləri, Assosiasiyanın prezidenti Li Siaolin, Çin Kommunist Partiyasının, Xarici İşlər Nazirliyinin, Çin hökumətinin üzvləri və digər ictimai qurumların təmsilçiləri iştirak edib.

Eurasia Diary-nin keçmiş baş redaktoru, siyasi analitik, teleaparıcı Malik Əyyub Sumbal qarşılıqlı mədəni tədbirlərin keçirilməsini yüksək qiymətləndirir.

O, hesab edir ki, tədbir həm mədəniyyətləri sıx birləşdirəcək, həm də mədəni diplomatiyanı gücləndirəcək.

Qeyd edək ki, konsertdə Üzeyir Hacıbəyli, Fikrət Əmirov, Qara Qarayev, Niyazi və digər tanınmış Azərbaycan bəstəkarlarının əsərləri səsləndirilib. Konsert İfaçılıq Sənəti Milli Mərkəzində keçirilib.

Cənab Sumbal tədbirin iki xalq arasında qarşılıqlı əlaqələrin inkişafı baxımından əhəmiyyətini vurğulayıb: “Bu mədəni tədbir hər iki xalqın mədəniyyətləri arasında qarşılıqlı anlaşmaya xidmət edəcək”. O, həmçinin bildirib ki, tədbir Çin və Azərbaycan arasında "Kəmər və Yol" layihəsinin inkişafına təsir edən güclü əlaqələrin başlanğıcı sayıla bilər.

Cənab Sumbal Azərbaycan və Çin münasibətlərinin parlaq gələcəyinə inamını bildirib.