Məlumdur ki, dünya xalqlarının mətbəxi milli mədəniyyətin ən yaxşı təşviqatçıları sırasındadır. Meksika mətbəxi yalnız olaraq meksikalıların və bu Latın Amerikası ölkəsini ziyarət edən çoxsaylı turistlərin ağız dadlarını oxşamır, eyni zamanda zəngin Meksika mədəniyyətinin bir hissəsini ölkə hüdudlarından kənarda nümayiş etdirir. Vurğulaya bilərik ki, bugün milli mətbəx hər il 39 milyondan çox turisti Meksikanı ziyarət və kəşf etməyə cəlb edən mühüm amillərdən biridir.
Azərbaycanlıları daha yaxından Meksika mədəniyyəti ilə, ələxüsus mətbəxi ilə tanış etmək məqsədilə Meksikanın Azərbaycandakı Səfirliyi, M´EAT restoranı ilə əməkdaşlıq əsasında, Meksika Gecəsi tədbiri çərçivəsində Meksika milli təamların təqdimatını təşkil etdi. Tədbir yanvarın 22-də adıçəkilən restoranda baş tutdu.
Tədbir iştirakçıları yeni dadları kəşf edib, Meksika mədəniyyətinin xüsusiyyətlərini tanıdılar, eyni zamanda Meksikanın adət-ənənələrinə daha da yaxın oldular. Bu xüsusda, iştirakçılar hər iki ölkənin mədəniyyətləri arasında bir sıra oxşarlıqlara nəzər yetirib, Mariaçi Bakı qrupunun musiqili müşayiəti ilə təqdim olunan təamlardan zövq aldıqlarını bildirdilər.
Giriş sözü ilə çıxış edən Meksikanın Azərbaycandakı səfiri Rodriqo Labardini iştirakçıları salamladı və onlarla Meksika mətbəxi haqqında bəzi vacib məlumatları bölüşdü. Diplomat qeyd etdi ki, ölkəsinin milli mətbəxi 2010-cu ildə YUNESKO tərəfindən Qeyri-Maddi Mədəni İrs siyahısına daxil edilmişdir. Vurğuladı ki, bu sektor turizm və milli iqtisadiyyat üçün böyük əhəmiyyət kəsb edir, belə ki, ölkədə 5,5 milyon iş yeri yaradır. Səfir əlavə etdi ki, milli mətbəx nəsillər vasitəsilə ötürülərək Meksika xalqının qeyri-maddi dəyərlərini təşkil edir.