Təzəpir məscidi ətrafında ortaya çıxan tapıntı gerçək tarixdir yoxsa adi qalıqlar? - FOTO | Eurasia Diary - ednews.net

18 Avqust,


Təzəpir məscidi ətrafında ortaya çıxan tapıntı gerçək tarixdir yoxsa adi qalıqlar? - FOTO

Mədəniyyət A- A A+

Dünən Təzəpir məscidi ətrafında aparılan qazıntı işləri nəticəsində hamam qalıqları aşkar olunub. 

Orada aparılan tikintinin əsas icraçıları hesab olunan Qafqaz Müsəlmanları İdarəsi və “Archico” MMC adlı şirkət sualları cavablandırmaqdan imtina etsə də “Təzəpir” məscidinin nümayəndəsi Məhəmməd Qasımov deyib ki, həmin hamam tarixi abidə filan deyil. Nisbətən təzə hamamdır, sovet dövründə tikilib. Amma nədən sovet dövründə tikilmiş hamamın hazırda yerin altından çıxdığı barədə suala cavab verə bilməyib. Həmçinin abidənin tapılması barədə müvafiq orqanların heç birinə məlumat verilməyərək tikinti işləri davam etdirilib.

İqtisadçı Toğrul Maşallı isə məsələyə belə münasibət bildirib: "Arxeoloji qazıntılar üçün 2-3 ay lazım olacaq. Hətta bunun nəticəsində arxeoloji qazıntı ərazisi 5-6 dəfə arta bilər. Ola bilər hətta yeni kənd, yeni tikililər də tapa bilərik"
Müəyyən müddətə ərazi ətrafında qazıntı işləri dayandırılıb. 

Tarixçilər də iqtisadçının bu fikrini dəstəkləyiblər və həmin ərazidə arxeoloji qazıntılar aparılmasının mühüm olduğunu qeyd ediblər. 

Sosial şəbəkə istifadəçiləri də bu hadisəyə laqeyd yanaşmayıblar. Bir çox sakin həmin ərazinin qədim olduğunu və tarixi abidələrə lazimincə qayğı göstərilmədiyini deyirlər.

Həmin istifadəçilərdən biri bloger Cavid Ağa hadisəni belə şərh edir: "Dünən Təzəpir Məscidi yaxınlığındakı qazıntıda yerin altından hamam çıxdı. Məscid işçiləri dedilər ki, Sovet dövrünə aid şeydir, boş verin. Amma sovet dövrü tikilən bina niyə torpağın bu qədər altında olsun ki? Kim bilir tariximizin hansı dövrünə aid bir abidəni də belə məhv etdik. Şirvanşahlar, Səfəvilər, bəlkə də daha qədimi idi. Qafqaz Müsəlmanlar İdarəsi sağ olsun, heç vaxt bilə bilməyəcəyik. Görəsən, Notr-Damın yanmasından zövq alanlar bu hamamın söküntüsündən də zövq alacaqmı? Məntiqi ardıcıllıq "əcəb olsun"u bu hamam haqda da tələb edir. Və yaxud, bundan sonra bizim başqa xalqları günahlandırmağımız üçün nə qədər əsasımız olacaq?"

ANS TV-nin keçmiş əməkdaşlarından olan Elşən Quliyev isə mövcud məsələni biraz da genişləndirərək deyib: "Sovet vaxtı tikilən hamam üstdə idi və rəsmən fəaliyyət göstərən 9 nömrəli hamam idi. Onu da neçə illər əvvəl söküblər. Yerin altında tapılan bu hamam həqiqətən də, daha qədim hamamdır. Ümumiyyətlə, Bakıda hamam və məscidin bir-birinə yaxın tikilməsi ənənəsi var. Hardasa hamam varsa, demək onun yaxınlığında məscid olmalıdır, yaxud da əksinə. Bu məntiqlə, Təzə Pir məscidi ətrafında onun qədər də qədim olan hamam olması mütləq idi."

Dünən verilən müsahibədə Nazirlik yanında Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynov demişdi ki, bu sadəcə 12 il əvvəl sökülən lakin indi külxanası qalan hamamın qalıqlarıdır. Bu tapıntının isə tarixi abidə siyahısında olmadığını deyib. 

Yasamal Rayon İcra Hakimiyyəti isə bildirib ki, bu cür hallarla Mədəniyyət Nazirliyi məşğul olur. 

Həmin hamamın qalıqlarının aqibətinin isə necə olacağı bilinmir.

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...