Bu gün Xalq artisti Nürəddin Mehdixanlının doğum günüdür. N.Mehdixanlı 1956-cı il oktyabrın 6-da Cəlilabad rayonunun Tahirli kəndində anadan olub.
Eurasia Diary-nin verdiyi xəbərə görə, doğum günüylə bağlı Moderator.az-a danışan Xalq artisti Qarabağ işğal olunan gündən indiyə kimi heç vaxt ürəyinin açılmadığını bildirib:
"Təbrikiniz üçün çox sağ olun. Bu gün istirahət günü olsa da, hazırda teatrda işdəyəm. Doğum günümü sıradan bir gün kimi qeyd edirəm. Ümumiyyətlə, mən bir az təntənəli şeylərdən uzağam. Bu gün də axşam evə qayıdıb ailəmlə birlikdə olacağıq. Qaldı ki, səhər açılandan dostlar zəng vurub təbrik edirlər".
Xalq artisti arzularını da dilə gətirib:
"Özümə sağlamlıq arzulayıram. Fərqi yoxdur bir il, ya da beş yaşayırsan. Əsas odur ki, sağlam yaşayasan. Xalqımıza da sağlamlıq arzulayıram. Bir az ritorik çıxsa da bunu deyəcəm, bayramlar keçiriləndə mən bir az belə şeylərdən üşənirəm. Bunlar mənim ürəyimcə olmayan şeylərdir. Gəlin, səmimi danışaq. Bir millətin ki, iyirmi faiz torpaqları işğal altındadırsa, bu heç vaxt ürək açmır. Həmişə ürəyiminin bir tərəfi quru olur. Bilmirəm axırıncı dəfə televiziyada konsertdə nə vaxt baxmışam. Baxa bilmirəm belə şeylərə. Ola bilsin ayrı-ayrı simfonik əsərlərə qulaq asaram. Arzu edərdik ki, Qarabağ problemi bitsin. Bu doğrudan da başıaşağılıqdı. Bu iş bitsin ki, adam ürək dolusu ad gününü keçirsin, Bakının gözəl parklarında, küçələrində gəzsin. Başqlarını bilmirəm necə fikirləşir, amma mən kiminlə görüşürəm və görürəm ki, hamının gözündə bir sual var və soruşurlar ki, bu iş nə vaxt həll olunacaq? Kimə nə cavab verib, nə deyəsən? Reallıq budur, amma arzu edərdim ki, bizim də ad günlərimizi, bayramlarımızı keçirəcək günümüz olsun.
Bu məsələ bitsin, həll olunsun, millət bir dərindən nəfəs alsın və dönsün sağına-soluna baxsın. Mənə elə gəlir ki, onda özümüzə hörmət hissi qalxacaq. İndi hamımız bir-birimizin gözünə birtəhər baxırıq, biri bir söz deyən kimi tapança kimi "açılırıq", amma heç bir səbəb yoxdur. İnsanlar hamısı aqressivdir və bunun da kökünü axtarsaq, görərik ki, səbəbi Qarabağın işğalda olmasıdır. Təsəvvür edin ki, Azərbaycan Televiziyası elan edir ki, Azərbaycanın Dağlıq Qarabağ ətrafında olan yeddi rayonu işğaldan azad olundu. Bilirsiniz bu nə deməkdir? Ondan sonra bu millət əliyalın, başıaçıq o yerlərə gedər. Bu ruh məsələsidir, ruh dirilməlidir və İnşallah belə də olar".