Çanaqqaladan ayrılmadan öncə, Türkiyə Cümhuriyyətinin Mədəniyyət və Turizm Nazirliyinin dəvəti və onun nəzdində fəaliyyət göstərən Türkiyə Turizm Tanıtım və İnkişaf Agentliyinin təşkilatçılığı ilə baş tutan səyahətimizin üçüncü günü, dünyanın dörd bir yanından turistləri cəlb edən əfsanə bir tapıntıya şahid olmağa getdik. Bu torpaqların minilliklərə dayanan tarixi Homerin İliada və Odisseya dastanlarında bəhs olunan qədim Troya şəhəri ilə bağlıdır. Tarixi üç min ilə dayanan bu şəhər, qədim sivilizasiyanı torpağın dərin qatlarında gizlin saxlayıb.
Öncə Troya muzeyinə səyatdən başladıq. Burada Türkiyənin şanlı Osmanlı dönəmində ortaya çıxarılan yüzlərcə qədim tapıntılar, həmin ərazilərin eramızdan əvvəlki sakinlərinin həyat tərzini əks etdirən görüntülər və istifadə edilən antik əşyaların tapıntıları yer alır. Üç mərtəbədən ibarət olan muzeyin hər mərtəbədə minillərin tarixi abidəsi sərgilənir.
Troya muzeyi Çanaqqlanın Tevfikiyye adlanan qəsəbəsində, Çanaqqaladan təxminən 29 km cənubda yerləşir. Ərazi mərmər və xüsusi andessit daşları ilə hazırlanan qədim memarlıq və sənət abidələri ilə zəngindir. Qazıntı zamanı tapılan xüsusi çiy kərpiclərlə tikilmiş qala divarlarları, bu ərazinin tarixdə ən qədim şəhərlərin varlığına şahid olduğunu göstərir. Məhz Homerin dastanındakı amansız savaşlarla tanınan Troya şəhərinin qalıqları qat-qat hörülən bu divarlardan və kiçik şəhər layihəsi çərçivəsinə tikilən evlərin qalıqlarından ibarət olduğu bildirilir. Troyanın inkişaf tarixinin doqquz hissədən ibarət olduğu deyilir. Təxminən 600 il bir-birindən fərqlənən hər tarixi mərhələ Troyada baş verən xüsusi hadisələri özündə əks etdirir. Şəhərin giriş hissəsində simvolik olaraq tikilən at heykəli əraziyə xüsusi möhtəşəmlik verir. Turistlərin çoxusu həmin atın yanında və hətta nərdivanları ilə çıxaraq içərisində fotoşəkillər çəkdirməyə can atır.
Digər bir at heykəli Çanaqqala şəhərində, Dardanel (Çanaqqala) boğazının sahilində yerləşir. Yeni olmasına baxmayaraq, bu at heykəlinin də, özünəməxsus maraqlı tarixi var. Qeyd etməliyəm ki, 2004-cü ildə çəkilən Troya filmi məhz Türkiyənin Çanaqqala şəhərində çəkilib. Filmdə Troya atını nümayiş etdirmək üçün həmin at heykəli hazırlanır və kinonun çəkilişi tamamlandıqdan sonra filmin rəhbər heyəti həmin atı Türkiyə Cümhuriyyəti Çanaqqala şəhər bələdiyyə rəhbərliyinə hədiyyə olaraq verir.
Bir neçə saatlıq Çanaqqaladakı tarixi ziyarətimizdən sonra Troyadan ayrıldıq və yolumuzu İstanbula doğru davam etdik. Beş saat sürən səyətimiz əsnasında Türkiyənin Mərmərə bölgəsinin ən maraqlı və gözəl mənzərələri ilə tanış olmaq şərəfinə nail olduq. Səyahətimiz davam edir və sizləri tezliklə İstanbuldan salamlayacam.
Elnur Ənvəroğlu
Çanaqqala, Türkiyə
