Kinorejissor, aktyor Taleh Yüzbəyov çəkdiyi "Zəhər tuluğu" filmi ilə bağlı olan tənqidlərə münasibət bildirib.
EDNew.net xəbər verir ki, o, bu barədə fikirlərini özünün “Facebook” sosial şəbəkə hesabında izləyiciləri ilə paylaşıb.
“Neçə müddətdən sonra keçən ilin sonu "Zəhər tuluğu" filmimizi də böyük ekranlara çıxara bildik. Şükür çıxan gündən səs-küyə səbəb oldu. İnsanlar filmə baxdılar, tərifləyənlər də oldu, müzakirə edənlər də, bəyənməyənlər də. Bu normaldır. Hamı hər şeyi bəyənməyə məcbur deyil. Biz nə çəkdiyimizi, necə çəkdiyimizi və niyə çəkdiyimizi bilirdik. Filmimiz artıq neçə həftədir ki, Azərbaycanda kinoteatrlarda ən çox baxılan filmdir”,- deyə Yüzbəyov yazır.
Aktyor qeyd edib ki, film bir çox insan tərəfindən bəyənilib və bu onu çox sevindirir. Postunda o, əsasən həmkarları tərəfindən tənqid olunmalarının isə çox təəssüf doğurduğunu da vurğulayıb.
“IMDb reytinqimiz 9,4-dür. Hardasa iki minə yaxın səslə. Gördüyün işin bəhrəsini görmək çox xoş hissdir. Xoş olmayan isə səninlə eyni sahədə olan, sənə üzdə dost görünən insanların gizli və ya yarı-gizli aqressiyalarıdır. Biri üstüörtülü status yazıb, bizim filmi və filmimizə gələn tamaşaçını aşağılayır ki, niyə onların filminə getmirlər, biri piktoqrafik status paylaşıb, öz aləmində söz soxur, biri haralarasa gizli məktublar yazır, biri orda-burda dalımızca iyrənc-iyrənc sözlər danışır. Bax sizi başa düşə bilmirəm. Tamaşaçı bəyənməyib status yaza bilər. Bu onun haqqıdır. Siz də bəyənməyə bilərsiniz. Bu sizin də haqqınızdır. Amma belə yarı-yapalaq nifrət püskürmək sizin işiniz deyil. Siz daha yaxşı olmağınızı sözlə yox, işinizlə bildirməlisiniz. Daha yaxşı filmlər çəkin, deyin bax film belə çəkilməlidir. Sevinməyən köpəyoğludur. Təki iş görün, belə aşağı hərəkətlər yox”.
Sonda aktyor bu fikirlərlə sözünü bitirib:
“Biz bu filmi dövlət hesabına çəkməmişik. Büdcə vətəndaş vergisindən formalaşmayıb. Bu film öz pullarımız və sponsorların hesabına yaranıb. Heç kəsə də zorla bilet satmırıq. İnsanlar öz xoşları ilə pullarını verib, filmə baxırlar. Heç kəsi də məcbur etmirik ki, bizə xoş sözlər yazın. Vallah özləri yazırlar. Çünki həyatda elə şeylər var ki, onları pulla, nifrətlə, paxıllıqla almaq olmur. Bu sevgidir. Tamaşaçı sevgisi. Sizə də həmin sevgidən arzulayıram.
EDNew.net