"Elmi Araşdırmalar" İctimai Birliyinin sədri Telman Qasımov "Avropa-Qafqaz-Asiya Beynəlxalq Nəqliyyat Dəhlizi” Proqramının əhəmiyyətini vurğulayıb.
Avropa İttifaqının TRACECA - “Avropa-Qafqaz-Asiya Nəqliyyat Dəhlizi” proqramı 1993-cü ilin may ayında Qafqaz və Mərkəzi Asiya ölkələrinin ticarət və nəqliyyat nazirlərinin (Azərbaycan, Özbəkistan, Qazaxıstan, Qırğızıstan, Tacikistan, Türkmənistan, Gürcüstan və Ermənistan) iştirakı ilə Brüsseldə keçirilmiş konfransda irəli sürülüb.
7-8 sentyabr 1998-ci il tarixlərində Bakı şəhərində 9 ölkənin dövlət başçısı - Azərbaycan, Bolqarıstan, Gürcüstan, Qırğızıstan, Moldova, Rumıniya, Türkiyə, Özbəkistan, Ukrayna, 13 beynəlxalq təşkilat və 32 dövlətdən nümayəndə heyətinin iştirak etdiyi Tarixi İpək Yolunun bərpasına həsr olunmuş beynəlxalq konfrans keçirilmiş və TRACECA Proqramı əsasında “Avropa – Qafqaz – Asiya dəhlizinin inkişafı üzrə beynəlxalq nəqliyyat haqqında Əsas Çoxtərəfli Saziş” imzalanmış, Bakı Bəyannaməsi qəbul edilmişdir. Əsas Çoxtərəfli Saziş (ƏÇS) Avropa, Qara dəniz, Qafqaz, Xəzər dənizi və Asiya regionunda iqtisadi, ticarət və nəqliyyat əlaqələrinin inkişaf etdirilməsi, avtomobil, hava və dəmir yolu, eləcə də ticarət gəmiçiliyi bazarlarına çıxışın asanlaşdırılması, yük və sərnişinlərin, həmçinin karbohidrogen resurslarının beynəlxalq daşımalarının inkişaf etdirilməsi, nəqliyyatın təhlükəsizliyinin, ətraf mühitin mühafizəsi, müxtəlif nəqliyyat növləri arasında bərabər rəqabət şəraitinin yaradılması kimi məsələlər üzrə əməkdaşlığı nəzərdə tutur.
Tədbirin təşkilatçısı Fariz Vəliyev bildirib ki, qarşımızda duran əsas məqsədimiz TRACECA layihəsinin əhəmiyyətini, iqtisadi zəzurətlərini və əməkdaşlıq potensialının inkişafını gənc nəsilə aşılamaqdır.
Qeyd edək ki, keçirilən tədbirdə Türkiyə səfirliyinin nümayəndəsi Cengiz Güneş, Atlas Araşdırmalar Mərkəzinin rəhbəri və siyasi analitik Elxan Şahinoğlu, Azərbaycan Gənclərinin Avropaya İnteqrasiyası Təşkilatı, Azərbaycan Dövlət İqtisad Universiteti və Azərbaycan Dövlət Pedaqoji Universitetinin tələbələri, QHT nümayəndələri və əcnəbi tələbələr iştirak edib.
Türkiyə səfirliyinin nümayəndəsi Cengiz Güneş bildirib ki, "Avropa-Qafqaz-Asiya Beynəlxalq Nəqliyyat Dəhlizi” Proqramı (TRACECA) Türkiyə və Azərbaycan kimi əlverişli çoğrafi mövqeyə malik dövlətlər üçün çox önəmli layihədir.
"Azərbaycan üçün faydalı olan hər şey bizim üçün də faydalıdır" deyən Cengiz Güneş, Azərbaycanın inkişafına görə çox şad olduğunu vurğulayıb.