“Bu gün Azərbaycanda dolların bahalaşması üçün zəmin yoxdur. Neftin indiki qiyməti səviyyəsində Azərbaycanın dollar ehtiyatı artır”.

Bunu Eurasia Diary-ə açıqlamasında iqtisadçı ekspert Samir Əliyev ilin sonuna kimi 1 ABŞ dollarının 2 manat olacağına dair məlumata  münasibət bildirərkən deyib.

Onun sözlərinə görə, Azərbaycanda dolların bahalaşması üçün 2015-ci illə müqayisədə zəmin yoxdur.

“Azərbaycanın ixracı azalmışdı. Yəni ölkəyə gələn dollarların həcmində azalma baş vermişdi. Amma indi neftin 1 bareli 60 dollardan bahadır. Bu vəziyyətdə manatı heç bir təhlükə gözləmir. Hökumət də manatın hazırda sabit qalmasıda maraqlıdır. Bizim hökümət manatı ucuzlaşdırmaqda maraqlı görünmür. Qərar dövlətin əlindədir. Xarici amillər də hələ ki,  manatı ucuzlaşdırmağa zəmin yaratmır.  Mən məzənnənin sabit qalacağı qənaətindəyəm. Yəni hökümət, Mərkəzi Bank manatı ucuzlaşdırmaqda maraqlı görünmür. Çünki ucuzlaşarsa fəsadları çox ağır ola bilər. Əlbəttə qərarı hökümət verir, Mərkəzi Bank verir. Mən ancaq gözləntimi deyə bilərəm.  Bu ilin sonuna qədər fövqalada hadisə  baş verməsə, yəni neftin qiyməti 30-40 dollara düşməsə, qiymət indiki səviyyədə qalsa, ilin sonuna kimi manatın məzənnəsinin dəyişməsini gözləmirəm. Amma 2 manatı xüsusi ilə gözləmirəm. Bəlkə 1 manat 80 qəpik, 1 manat 90 qəpikdən danışa bilərik. Ümumiyyətlə bunu gözləmirəm”, - deyə S.Əliyev bildirib.

Vəfa ƏLİYEVA